Jeho-a'n silver medal a la
Jeho Himnakulhpuingheta chuan 11Even Sports TTFI Natio-nal Ranking Table Tennis Championship, 2016 khelh zawh taka Sub Junior categoty-ah silver medal a la. Mizo naupang dang Alberto Lalremruata chuan bronze a la ve bawk.
Inrinni zan khan R. Dengṭhuama Indoor Stadium, Mualpuiah final hi khelh niin Mizo naupang beiseiawm Jeho-a hian inkhel bul a ṭan fuh tawk lo. Yashansh Malik lakah game hmasa pahnih chu 11-7, 11-9 in a hloh. Lunglei Salem Veng naupang Jeho-a hian a defensive game hmuhnawm lantirin game hnih la ve mah se 4-2 in an chak lo.
Semifinal-ah Jeho-a hian Delhi naupang Payas Jain chu 4-1 in a sawp a, inkhel dangah Alberto erawh champion zui ta Malik lakah hian 4-3 in a chak lo thung. Mizo naupang pahnih Jeho leh Alberto te hi tum ṭumah hian an inzir mekna Petroleum Sports Promotion Board (PSPB) hminga khel an ni.
India Cadet leh Sub Junior number 1 lo ni tawh Jeho-a leh Alberto te hi kumin National Table Tennis Championship-ah khan sub junior boys (U-15) final-ah an lo inhmachhawn tawh a, Lunglei Salem Veng naupang Jeho-a hian Mission Veng naupang Alberto Lalremruata lakah 4-3 a hnehna changin Mizo zinga champion hmasa ber a ni.
India president Pranab Mukherjee hnen aṭanga National Child Award for exceptional Achievement 2015 dawngtu Jeho-a chuan, "Mahni ram ngeiah national level inelnaa pakhatna ni thei ta lo mah ila medal ka lak avangin ka lawm a, min
ṭawiawmtu tam takte beisei ka phak lo erawh pawi ka ti. Hmasawn zel turin theih tawp ka chhuah zui ang," tiin Vanglaini palai a hrilh.
Table Tennis-ah chuan India hi zone pangaah ṭhen hran niin Mizoram thlen tak hi East Zone a ni a, kuminah hian North Zone, Central Zone, Indore Zone leh South Zone te khelh zawh tawh niin tun season chhung bikah chuan tun ṭum hi National Ranking Championship hnuhnung ber a ni. Zone hrang hranga ṭhen ni mah se ram pum aṭangin infiammi an fuan khawm ṭhin. Tun
ṭumah hian state hrang hrang 26 bakah institution 10 aiawh an kal khawm.
Mizoram Table Tennis Asso-ciation chuan National Ranking Cham-pionship an thleng thei chu an lawm thu an sawi. Joint Secretary R. Lalsangzuala chuan, "Kan sports minister kaihhruaina zarah kar khat awh inelna lian a vawi khat nana kan thleng thei hi a lawmawm a, hemi a hlawhtlin theih nana thathawhtu zawng zawng chungah lawmthu kan sawi," a ti.
TTFI Secretary Dhanraj Chou-dhury chuan Mizoram hmunhma ṭha a nih thu leh R. Dengṭhuama Indoor Stadium chu India ram pum huap pawha zahpuiawm lo tak a nih thu a sawi ve bawk.