Manchester United 1-1 Arsenal Premier League club vanduai ber kan ni - Mourinho

Old Trafford-ah Manchester United-in point thum hmuh phu mah se minute 89-naah Olivier Giroud-a'n chiang taka a tauh goal avangin Arsenal-in point khat an hlawh chhuak a, Jose Mourinho aia lawm zawk chu Arsene Wenger a ni.

1-1 in a tawp

Inrinni zan inkhelah Juan Mata hmangin minute 68-naah United-in goal an khung a, Jose Mourinho-a'n goal khat hum tumin goal khungtu Spanish midfielder aiah Morgan Schneiderlin a dah lut.

Arsene Wenger erawhin hemi hma hian Olivier Giroud bakah Alex Oxlade-Chamberlain leh Granit Xhaka te luhtirin siphurh sut ngei a tum thung. Minute khat chiah a awm tawh tihin Oxlade-Chamberlain-a'n dinglam kilah Marcus Rashford tlan pelin a ball cross ṭha bik chu box chhunga zuang sang ber French forward Giroud-a'n a tauh goal.

Penalty & Red Card?

United wing back Antonio Valencia chu first half-ah Nacho Monreal-a'n penalty area-ah a titlu a, Jose Mourinho leh a nauten penalty ni ngei turah ngai mah se referee Andre Marriner ngaihdan a dang.

English referee Marriner thu-tluk-na hi football expert ṭhenkhat bakah United player hlui Phil Neville ngei pawhin a ṭawmpui avangin penalty pek loh theih a ni.

United tan referee thutluknaah lawmna tur a awm tho a, Italian wing back Matteo Darmian-a'n Arsenal defender Carl Jenkinson a tihtluk vangin yellow card vawi hnihna phu mah se Marriner-a'n zahngaihna a lantir thung.

Pa naran Mourinho

Arsenal tan Alexis Sanchez leh Mesut Ozil te player naran ang chauh an ni a, amaherawhchu Giroud-a'n goal a khung chiah chuan Gunners ṭantuten naran tih an nei a, a hming chu Jose Mourinho a ni. Old Trafford-a Arse-nal ṭantute au hla chu 'Mou-rinho i special tawh lo," tih a ni.

Portuguese manager Mou-rinho hian tun season-ah club lian Manchester City, Liverpool, Chelsea leh Arsenal te a hma-chhawn tawh a, hneh a la nei lo. Season tinin club liana laka Mourinho record a chhe tial tial a, tun season bika a record hi chu coach naran tih theih a ni.

Manchester United hian April 1992 hnua a vawi khat nan Old Trafford-ah Premier League match thumah a zawnin an khingpuite an draw. Arsenal lakah United khel ṭha mah se an result a ṭhat tawk miau loh avangin record duhawm lo an nei chho zel.

Wenger tan thu lawmawm

Arsenal-in May 2007 khan Emirates Stadium-ah Chelsea 1-1 in an draw a, Gilberto Silva-a'n goal a khung. Brazilian midfielder-in goal a khung hnua Mourinho enkawl team laka Wenger-a naute zinga goal khung leh thei hmasa ber chu Giroud a ni.

Gunners-in first half-ah goal zawnah ball an pet lo a, minute 90 chhungin goal zawnah vawi khat chiah an pet chunga an record duhawm lo tak an thai reh thei hi an tan thu lawmawm a ni.

Kan vanduai - Mourinho

Manchester United boss Jose Mourinho chuan, "Ka player-te sawiselna tur ka nei lo a, an phu ang result an hlawhchhuah loh avangin pawi ka tihpui thung. Chak loah kan inngai a, Arsenal erawhin chakah an inngai. Burnley, Stoke leh Arsenal kan draw ṭumah awlsam taka chak vek thei kan ni a, kan point ruk hloh kha hmu ngat ila hmahruaitu nen chuan kan inhnaih khawp ang. Engpawh chu ni se Premier League club vanduai ber kan ni tih hi tlang hriat a ni," tiin an vanduai thu a sawi.

Match 17 a tling ta

Arsenal-in inelna hrang hrangah match 17 chhung hneh loh an tawng ta lo a, Premier League ṭan nia Liverpool an hneh loh hnuah hneh loh an tawng tawh lo tihna a ni.

French manager Arsene Wenger chuan, "Ṭum danga kan khingpuite kan nawr angin kan nawr thei lo a, Manchester United khelh ṭhat vang a ni pakhat a, kan khingpuite kha an inrem phui em em a ni. Chutihrualin ka naute an
ṭang rei thei a, hun tawp goal khung kha goal ṭha bik a ni," tiin an khel ṭha tawk lo tih a pha lo.

PSG leh Feyenoord

November 23, Nilaini zan hian Champions League-ah Gunners-in an mual Emirates Stadium-ah PSG an hmachhawn dawn a, Manchester United-in November 24, Ningani zan hian Europa League group match khel turin Feyenoord an mikhual thung ang.