Guardiola lawmna Toure goal

Manchester City mid-fielder Yaya Toure-a'n an manager Pep Guar-diola chunga ngaih-dam a dil hnuah Inrinni zan khan inkhel bul ṭantir a ni a, Ivorian midfielder hian goal hnih khungin khual-mualah Crystal Palace 2-1 in an hneh.

Inkhel dangah Premier League hma-hruai mektu Liverpool-in St Mary's Stadium-ah goal an khung thei lo a, Southampton nen point khat an insem. Reds leh City hian point 27 ve ve an hmu a, nizan khan point 25 hmu tawh Chelsea-in an khingpui Middlesbrough an hneh chuan hmahruaitu an ni ang.

Ngaihdamna leh Goal

Toure agent Dimitri Seluk ṭawng tam vang-in Guardiola-a'n ngaihdam dil a phut a, agent-in ngaih-dam dil lo mah se Ivorian midfielder ngaihdam dilna Guardiola-a'n a pawm. Selhurst Park-ah pawh hian mi tlemte chauhin Toure hi a kal ve tih an hria a, Champions League squad-ah pawh a awm loh avangin inkhel bul a ṭan pawh hi thil a mak a tling.

City manager Guar-diola chuan, "Toure ka lawmpui a, tunah chuan a rih zawng pawh a dik tawh. A thiamna chungchangah chuan rinhlelh tur a awm lo. Season
ṭantirhah kha chuan game plan-ah a tel lo a, tunah chuan kan thil tum thleng turin player pakhat kan neih belh leh a ni," tiin Toure chet ṭhat vanga a lawm thu a sawi.

Vanduaina

Liverpool-in hma-hruaina sawhngheh tum-in Southampton lakah attacking football khel mah se vanneihna an neih loh avangin goal an khung lo. Reds tan Sadio Mane-a'n a club hlui lamah goal a khung teuh a, Saints keeper Fraser Forster-a'n a save sak bakah hun tawp hma hretin defender Virgil van Dijk-a'n a dang hman bawk.

Reds tan hian Bra-zilian duo Philippe Cou-tinho leh Roberto Firmino bakah Nathaniel Clyne ten chance ṭha an hlah bawk. Liverpool boss Jur-gen Klopp chuan, "Chak thei kan ni. Point thum hmu lo mah ila kan khelh danah erawh ka lungawi. Team ṭha tak Southampton lakah goal kan chhuah lo," tiin an result vanga a hnual loh thu a sawi.

Hei le, Kane

Tottenham Hotspurs-in an mualah West Ham 2-1 a an hneh tawh dawn loa a lan hnuah Harry Kane a rawn inlar a, Eng-land striker hian hun tawp dawnah goal hnih khungin Spurs 3-2 an chak.

Tottenham manager Mauricio Po-chet-tino ho-ten league-ah hneh loh an la tawng lo a, anni chiah hi tun season Premier League-a hneh lo tawng lo awmchhun an ni.