Tennis khawvel roreltu Andy Murray

Theihna nei sang bik Roger Federer leh Rafael Nadal te vang-lai a pel tawh a, player huai-sen Novak Djokovic a herliam mek bawk. Tennis khawvelah chuan tun hi player beidawng duh lo Andy Murray a hun a ni ve ta.

Pathianni zan khan O2 Arena, London-ah ATP World Tour Finals hmawr bawk a ni a; Britain tlangval Murray chuan Djokovic lakah 6-3, 6-4 a hnehna changin a vawi khat nan champion nomawi a chawi. Kum 29-a upa Murray hian a zawnin match 24 chhung hnehna a chang ta a, a elpui ber a hneh tak avang hian world number 1 ni chungin season a khar.

World number 1 Murray chuan, "Ka champion thei hi ka lawm a, world number 1 ka ni chhunzawm thei hi a hlu zual bik. Inkhel hautak leh pawimawha Novak nena inhmachhawn hi a ropui a, ka hun tawn tawhah chuan hei aia hlu hi a awm thei chuang lo ang," tiin a sawi.

Murray chuan sawi chhun-zawmin, "Kuminah Grand Slam leh Olympic final ka khel a, khangte kha a hlimawm vek. Mahse tun ṭum hi chu a danglam bik a ni," a ti. Murray hi an rama inkhel a ni bawk a, ṭantu a ngah thei hle - final pawh hi mipui 17,000 zetin a hmunah an en.

Grand Slam vawi 12 cham-pion tawh Djokovic pawhin lawmpuina thu sawiin, "Andy hi khawvela player ṭha ber a ni a, world number 1 nih hi a phu. Inkhel hautakah bul ka ṭan fuh lo a, ka insiam ṭhat meuh chuan a tlai tawh bakah hnehna chan nan a tawk zo lo," a ti.

Champion Murray hian ATP Ranking point 1,500 a hmuh belh bakah $2,391,000 (Rs 16,31,02,065) a dawng bawk. A pumpuiah nomawi 44 a chawina chiah a ni a, world number 1 ni chunga ATP World Tour Finals cham-pion ni thei 10-na chiah a ni bawk.

Lal thar

ATP World Tour Final khelh zawh hma khan world number 1 ni chunga season khar tur a la chiang lo. Murray-a'n Serbian tlangval Djokovic lak aṭangin a dinhmun chhuhsak mah se champion zawk zawk tan number 1 nih theihna kawng a inhawng.

Tun hmain player pahnihte hi ṭum 34 an inhmachhawn tawh a, heng zingah hian ṭum 24 zet chu Djokovic-a'n hnehna a chang. Kumin Grand Slam hmasa pahnihah Australian leh French Open final-ah ngei pawh an intawng a, Djokovic hian hnehna a chang.

Season chanve a her liam meuh chuan Djokovic a khel ṭha chhunzawm lo a, a elpui Murray-a'n vanglai a hmang thung. Kum 29-a upa Murray hian kuminah match 78 zet hnehna a chang tawh a, ṭum kua chiah chak loh a nei - tennis a khelh hun chhunga a khelh ṭhat ber ṭum a ni.

Grand Slam vawi thum cham-pion tawh Murray hian Wim-bledon nomawi a chawi hnuah Rio Olympic-ah gold medal a la zui a, tun hnai thla hnih chhung lekin Beijing, Shanghai, Vienna, Paris leh Barclays ATP World Tour Final-ah te a champion kim vek a, a chung bera awm phu khawpin a khel ṭha tak zet.

Lawmpuina

Player ṭha rual Federer, Nadal leh Djokovic te hun laia rawn lang a nih avangin Murray hi player ṭha tak ni mah se a ropui tur angin a ropui tawk lo a nih pawhin a ngaih theih. Kum 1974 khan khatih hun laia kum 30 leh ni 11-a upa John Newcombe chu world number 1 thar a lo ni tawh, ani hnuah chuan kum 29-a upa Murray hi number 1 ni leh thei upa ber a ni.

Grand Slam vawi 17 zet champion tawh Federer chuan lawmpuina thu sawiin, "Novak-a tan kum bul kha hun ṭha a ni a, kum tawp lam chu Murray tan a ni thung. Andy number 1 ni chunga season i khar thei hi ka lawmpui che," tiin Twitter-ah a tarlang.