Ranieri-a hlauthawng lo

Tun season-a beisei phak lo Leicester City manager Claudio Ranieri chuan tun hnaia an khelh dan avanga a buai loh thu a sawi. Premier League champion Leicester hian table-ah 12-na dinhmun an luah mek a, relegation zone aṭanga an himna chu point hnih chiah a ni.

Italian manager chuan, "Kan dinhmun avanga rilru chi ai leh buai tura min ngai a nih chuan in tisual ang. Season hmasa khan keimah leh keimah kha ṭha takin ka in thlawp a, tunah pawh chutiang tho chu a ni. Premier League hi a harsa dawn tih ka hre sa a, hetiang em em erawh ka beisei lo. Mahse, tunah hian kan thawhlehna turin damdawi ṭha tak ka hria a, chu chu rim taka hnathawh chhunzawm a ni," tiin an tluk hlen a ring lo hle.

Chelsea boss hlui chuan a player chhuan-vawr Riyad Mahrez chung-chang sawi chhunzawmin, "Riyad-a'n ball a chan apiangin kan khingpui ten an hnaih chilh nghal ṭhin a, a tan a awlsam lo a ni. Simple taka inkhel turin ka duh ṭhin a, mah se kan innghahna ber a nih miau avangin a team tan hian thil danglam thlentir a tum ṭalh ṭhin," tiin tun hnaia sawisel hlawh a player chungchang a sawi.

PFA Player of the Year Mahrez hian tun season-ah beisei a phak lo a, league match 12 a inlan tawhah goal hnih chauh khungin inelna hrang hrangah match 17 khelin goal nga a khung tawh bawk.

Mahse, Ranieri-a'n a player pawimawh hi sawisel duh loin, "Riyad hian season chhe tak a hmang hran lo. Premier League-ah theihtawp a chhuah reng a, Champions League-ah a khel ṭha em em reng bawk a ni," a ti.

Foxes hian zanin dar 1:15-ah Champions League match khel turin Club Brugge an mikhual dawn a, group stage-a chak loh hmel la hmu lo club hian point khat an hlawh chhuak a nih pawh last 16 an lut chiang tawh ang.