Tottenham tan chak a ngai
Champions League knock out round lut turin Tottenham tan chak loh a thiang tawh lo. Mauricio Pochettino naute hi zanin dar 1:15 hian AS Monaco khelmualah an lenglut dawn. Group E inkhel dangah Russian club CSKA Moscow chuan dar 10:30-ah Bayer Leverkusen an lo mikhual ve bawk ang.
Spurs fiahna
September 13 khan Wem-bley-ah club pahnihte hi an lo intawng tawh a, mikhual Monaco-in Bernardo Silva leh Thomas Lemar te goal khung hmangin 2-1 in hnehna an chang a, Spurs goal neihchhun hi Toby Alderweireld khung a ni thung.
Tottenham hian group stage-ah match li an khelh tawh aṭangin point li chiah an la hmu a, an chungah hian Monaco (8 points) leh Leverkusen (6) te an awm. Spurs hi an chak lo a nih chuan an khingpui Monaca-in last 16 an lut chiang dawn a, inkhel dangah German club-in hnehna an chang a nih chuan an tlang ve nghal thei bawk dawn a ni.
Kane vs Falcao
Premier League season kal laia hneh loh nei lo awm chhun Tottenham tan striker Harry Kane hliam a dam tawh a, innghahna tham a tling. England international hi Arsenal an hmachhawn ṭumin goal nen a lo kir a, kartawp inkhelah West Ham 3-2 a an lehthalnaah goal hnih a khung leh tawh bawk.
Manager Pochettino chuan Toby Alderweireld leh Erik Lamela te chu khup leh khel na vangin an inlantheih loh tur thu a sawi lawk tawh a, rawlthar Deli Alli erawh West Ham an hneh ṭuma a inlan leh tawh tawh avangin Monaco pawh a hma-chhawn thei tawh tura ngaih a ni.
Hetihlai hian Monaco pawh an kaltluan lai a ni ve bawk. French Ligue 1-ah Monaco hian match 13 khelh aṭanga point 29 hmuin pahnihna an ni mek. Manchester United leh Chelsea tana khel tawh Radamel Falcao-a'n goal khung a chhunzawm zel bawk. Colombia international Falcao hian tun season-a a goal 11-na ni turin Lorient 3-0 a an hneh ṭumin goal a khung.
Leonardo Jardim-a naute zingah midfielder Joao Moutinho chu a malpui na vangin a inkhel thei dawn lo a, chawn na vangin Almamy Toure leh Nabil Dirar te dinhmun a chiang lo bawk.
Sulhnu
Wembley-a 2-1 a an tlawm hma khan Spurs hian Monaco lakah record an nei ṭha viau a, season hmasa khan Europa League group stage-ah intawngin France-ah 1-1 a an inhnehtawk hnuin an khelmualah 4-1 in an sawp, heng inkhel pahnihah hian Eric Lamela chuan goal li ngawt a khung nghe nghe.
Tun hmain Spurs hian France-ah chakni hmel an la hmu ngai lo a, vawi li an zin chhuhah ṭum thum chu inhnehtawkin vawi khat an chak lo - tun ṭumah hian an tih theih ngai loh tih a ṭul dawn. Monaco hian Premier League club vawi 15 an hmachhawn tawh a, vawi sarih hnehna changin ṭum li ve ve chak loh leh draw an nei bawk.
Inkhel dang
Bundesliga lama result nei ṭha lo Leverkusen tan last 16 luh leh luh loh chu an kutah a awm tawh a, hnehna an chang a nih chuan inkhel lehlamah Suprs-in hnehna chang pawh ni se an dinhmun a ṭha tawh hle ang. An chak lo a nih erawh chuan an group match hnuhnung berah Monaco an mikhual dawn avangin kawng a harsa sawt dawn. Leverkusen hian kartawp an league match-ah kai thar RB Leipzing 3-2 in an hneh lo a, inkhelh harsatna hmuna Russia-a point thum hmu tur chuan insiamṭhat an ngai hle.