Milan leh Inter inhnehtawk

Pathianni zan Serie A inkhelah AC Milan leh Inter Milan te chu 2-2 in an inhnehtawk. Inter manager thar Stefano Pioli tan an hmelma club laka point hmuh nghal hi result ṭha a ni ngei ang.

San Siro-a inkhelah mikhal chan chang zawk Inter-in bulṭan ṭha zawk mah se Milan tan Suso chuan minute 42-naah goal hmahruai a khung. Second half ṭantirah Inter tan Antonio Candreva chuan sut ve mah se Liverpool winger hlui Suso hian an goal hnihna leh an hmahruai vawi hnihna ni tura a khung zui leh avangin chak tlang tura ngaih an ni tawh.

Mahse, Inter an beidawng duh lo. Frank de Boer an ban hnua an lakluh Lazio manager hlui Piolo-a'n a naute a fuih phur ṭha a, hamrik hnuhnung ber a rik hma chu an beidawng lo. Ivan Perisic chuan hun pek belhah an si phurh sutin point hlu tak a hlawh chhuak.

Inter hian tun season kal mekah hun tawp hma minute 15 chhungin goal riat an khung tawh a, AS Roma nen hun tawp dawna goal khung hnem ber an ni.

Milan hian Serie A match 13 an khelh tawh aṭangin point 26 an hmu tawh a, league table-ah pathumna niin hmahruaitu leh champion lai ni bawk Juventus an phaklohna chu point sarih a ni mek. Inter erawhin point 18 chiah an la neih avangin pakuana an la kal pel thei lo.

Inter manager Pioli chuan, "Ka naute khelh dan en kha chuan chak phu zawk kan ni. Team kan inkhairual theih dan tur ka ngaihtuah a, kan chak lohna lai tam tam a lo lang bawk. Kan goal chhuah pahnih kha counter attack aṭang a nih avangin kan tlahnung ven dan kan inzir nasat a ṭul ang," tiin a sawi.

Milan coach Vincenzo Mon^-tella chuan, "Kan khingpui ten hun tawp rualin min nihrualna goal an khung a, a pawi hle. Chutihrualin ka naute khan an khel ṭha takzet a, point kan hloh chu uiawm hle mah se lungngaihna tur a awm lo. Club president Silvio Berlusconi pawh-in kan hmasawn dan a hmuh khan a a lawm hle a ni," a ti.

Inkhel dang

Inkhel dangah Lazio chuan an mikhual Genoa lakah 3-1 a hnehna changin table-ah palinaah an inhlangkai a, pahnihna Roma erawh an mikhualna ramah Atalanta lakah 2-1 a an tlawm avangin Juve nen an inkar an ti zim thei lo.