Chennai Open khel tur Cilic

India rama ATP World Tour event pakhat 2017 Aircel Chennai Open-ah US Open champion hlui Marin Cilic chuan a inlan tur thu a ti chiang.

World number 6 Cilic hian Pathianni khan season tharah India rama a rawn kal tur thu hi a ti chiang a, he hmuna hlawh-tlinna lo chang tawh Stan Wawrinka leh Rafael Nadal te erawh an inlan dawn lo tih a chiang tawh.

Kum 28-a upa Cilic chuan, "Chennai-ah hian tennis ngainatu an tam hle a, an hmaa ka inkhel leh thei tur hi ka lawm hle. Season thar bulṭanna duhawm tak a nih ngei ka beisei a, ka nghakhlel tawh hle," tiin a sawi. Kum 2014 US Open champion Cilic hi Chennai-ah hian ṭum sarih a inlan tawh a, kum 2009 leh 2010 te khan a champion.