Zanin dar 7:00-ah Flying Cristabel MPL U18 Bethlehem Vengthlang Vs Chanmari West

Flying Cristabel Mizoram Premier League Under 18 final chu a vawi khat nan zanah khelh a ni dawn. Bethlehem Vengthlang leh Chanmari West te zanin dar 7:00 hian Lammualah an inkhel dawn a, en man hi Rs 20 chauh a ni.

Thawnthu hlui leh thar

MPL club-te tana kum bithliah inelna hi vawi li neih a ni tawh a, Chanmari FC-in inelna hmasa pahnihah no-mawi an chawi hnuin Mizoram Police kum zawnin an champion leh bawk. Dinthar FC-in kum li chhung a zawnin final an lut vek a, nomawi erawh an la chawi lo.

Kumin MPL U18-ah cham---pion lai Mizoram Police chu an senior team an relegate avangin an tel thei lo a, vawi li final lut tawh Dintharin an record duhawm chhunzawm thei loin table mawngphahah an awm bawk.

MPL kaithar Chhinga Vengin hneh loh nei loin semifinal an lut a, Bethlehem Vengthlang lakah an mualpho. Season tina champion tura beisei Aizawl FC-in kum dang ang thoin final an lut pha lo a, I League club AFC U18 hneh loh chu Chanmari West an ni.

Bethlehem VT leh Chan-mari West te hi an vawi khat final luhna a ni a, zaninah champion thar an awm ang.

Ramhluna naute

Mizoram football a ṭhan theih nan Lalramhluna'n tha a thawh hlawk a, 1st Bn MAP Football Academy coach niin footballer ṭha ṭhahnem tak chher chhuaktu a ni.

Tun season-ah hian Chan-mari West FC leh 1st Bn MAP Aca-demy an thawk dun a, hei vang hian West Warrior hi champion lai anga sawi theih an ni. Mizoram Police a zawna kum hnih an champion ṭum khan tuna West Warrior coach Ramhluna leh assistant coach Lalnunzira te thoin an enkawl.

MPL best player hmasa ber Laldanmawia, Chanmari FC captain Lalrinchhana, Dinthar FC captain VL Chhanhima, Zo United captain R. Lalthan-tluanga bakah player ṭhahnem tak 1st Bn MAP Academy
aṭangin an inzir chhuak tawh a, tualchhung football tana Chanmari West pachal Ramhluna hnathawh hi a hlu.

Goal 32 khung thei

Chanmari West-in group stage match ruk lekah goal 32 an khung a, attacking football khel turin an ṭha tawk tih a lang chiang hle.

Serchhip rawlthar Lalenkawla'n goal 10 a khung tawh a, final-ah eng result pawh thleng se West Warrior forward hi top scorer ni tura ngaih a ni tawh.

Enkawla hnaih bertu Chhinga Veng captain F. Lal--nun-tluanga'n goal sarih a khung a, ani erawhin a khung belh tawh dawn lo.

West Warrior forward Lalrinpuia leh BVT forward Joel Lalmuanpuia ten goal ruk ve ve khung tawh mah se final chiah khelh tur a awm tawh avangin top scorer beisei ngam chi a ni tawh lo. Amaherawhchu MPL Under 18-ah hian position tinah player ṭha ber an thlang dawn a, hei erawh final zawhah chiah a hriat ang.

Vawi thum champion

Chanmari West coach chuan, "MPL U18 kum thum a zawna champion hi kan tum. BVT nen league round-ah kan inhnehtawk a, player ngai tho an nih chuan kan chak ngei ka ring," tiin nomawi chawi turin a inringtawk hle.

MPL Under 18-ah hian kum 18 hnuai lam player tawh phawt chu khawi DFA hnuaia inziak lut pawh ni se khelh phalsak an ni - Chanmari West player-te hi ADFA first division-a 1st MAP Football Academy naupangte deuh vek an ni.

BVT an tho

Bethlehem Vengthlangin semifinal lut turin round hnu-hnung ber thleng an nghah a ngai a, Zo United 4-1 zeta hnehin knockout stage an lut. Amaherawhchu hemi hma hian inkhel pawimawhah Aizawl FC 1-0 a an hneh theih avangin team ṭha an ni tih a hriat tawh a, champion tura an ṭha tawk tih nemnghehna chu semifinal-a Chhinga Veng 3-1 a an hneh thei kha a ni.

BVT-in tlarhmaa an neih hriam ber chu Joel-a a ni a, goal ruk khung tawh forward hi Chanmari West rawlthar a ni! Tlarhma lam tan PC Laltlanhlua leh K. Lal-mal-sawma bakah keeper Ram-dinzela te awmna BVT tlarhnung sut hawn hi a awlsam dawn lo.

Bethlehem Vengthlang coach Benjamin Lalhriatpuia chuan, "Kan vannei tih kan pha lo a, final thleng tur pawhin vanneih ṭum kan ngah. Kan naute field chhung leh pawnah an inkawm ngeih a, an inpekna leh an thawhhona ṭha hi kan result neih ṭhatna chhan a ni. Tun anga discipline ṭha team hi ka la enkawl ngai lo a, Pathian kaihhruaina vang chauha tun dinhmun thleng thei kan ni," tiin an inlungrual thu a sawi.

Mipui tam

BVT lamin MPL U18 final an la thutak a, senior team player zingah an naute final inkhel ṭawiawm lo an awm a nih chuan practice ang thoin Rs 300 chawitir an ni dawn!

Mipui lam pawhin an veng rawlthar rual chetla hi an ṭawiawm ṭha ngei ang, BVT FC-in MFA Super Cup leh I Day Football final an khelh ṭumin Lammual mawi tham Bethlehem Vengthlang mipui an pungkhawm.

Chanmari West hi BVT ang thoa veng lian an ni a, football-ah sulhnu ṭha tak nei mah se tun hnaiah nomawi liantham chawi an nei lo. Kum 2012-a Central YMA Football final an thlen ṭumin Chanmari West-in Armed Veng an hneh lo a, tun ṭumah erawh champion tura rinkai zawk an ni a, hei vang tak hian BVT aiin inkhel entu an tam a nih pawhin a mak lo ang.