Costa hoin a chung berah Chelsea

Khelmual pawn lama chan-chin a ngah tluk zetin khelmual chhung lamah pawh Diego Costa chanchin sawi a bang thei lo - Spain striker hian Pathianni zan khan Middlesbrough khelmualah goal khungin Chelsea chu 1-0 in hnehna a chanpui a, Liverpool tlanpelin Premier League table chung berah an awm ta.

Kum 28-a upa Costa hian minute 41-naah he inkhela goal awmchhun hi a khung a, Boro tlarhnung buai nuai karah goal khung phu Chelsea tan goal a khung. Blues-in goal dang khung tumin nawr chhunzawm mah se Pedro chuan a hun ṭha neih uiawm takin a khawhral.

Boro an awm mai mai bik lo. Minute 78-naah Alvaro Negredo chuan an si phurh sutna remchang a nei a, Manchester City striker hlui hmaa ding hi Thibaut Courtois-a nih miau avangin Belgian keeper hian goal a chhuah duh tlat lo.

Hei le 3-4-3!

Chelsea-in season ṭan dawnah Juventus boss hlui Antonio Conte an lalut a, Euro 2016-a Italy kaihruai zo hlim coach hnen aṭang hian mi tam zawk chuan defensive game an beisei. Mahse, beisei angin Blues tlarhnung a phui tawk lo a, September 24 London Derby-a Arsenal 3-0 tehmeuha an hneh loh kha Conte beng harhtu a ni.

Italian manager hian an ram lama a hlawhtlinpui tawh 3-4-3 formation hmang turin Blues player-te a chher a, Arsenal an hneh loh hnua an match hmasa bera Hull City an hmachhawn
ṭumin he formation hi an hmang nghal - Conte-a'n 3-4-3 a hman hnuah league match ruk khelin tlawm hmel an la hmu lo a, goal an chhuah miah lo bawk!

Jose Mourinho hnuaia pla^-yer 'naran' Victor Moses chu Chelsea tan player pawimawh pawl a ni tawh a, a khelh ngai lohna 'wing back'-ah Fiorentina aṭanga Blues zawmtu Marcos Alonso nen an khel ṭha ṭhin takzet - tlarhnung laia Gary Cahill, David Luiz leh Cesar Azpilicueta inkawp hi sawi hmaih theih an ni lo bawk.

Chelsea hian November 26-ah Tottenham Hotspur mikhualin December 3 zanah Manchester City an lenchilh leh bawk ang a, 3-4-3 hian eng chen nge a thlenpui theih dawn a chiang lehzual ang.

Costa a hlu

Chelsea boss Antonio Conte-a'n inkhelh ṭan hmain Costa a fak a, Spain international hi 'khawvela striker ṭha ber pawl a ni' tiin a sawi - Pathianni zan thlenga Premier League-a a khelh dan en chuan Italian manager thusawi ṭawmpui mai loh hi chu tih tur a vang hle.

Kum 28-a upa striker hian Boro lakah goal khungna hun ṭha nei tam lo mah se inkhelh chhung zawngin an khingpui tlarhnung a chhaih buai a, a che vel leh tharum ngahna chu Boro tlarhnung tan lu haina tham a ni. Atletico Madrid forward hlui hian a hun ṭha neih khawhral a tum lo tih a goal khung dan aṭangin a lang chiang a, Eden Hazard corner aṭanga ball kal khung tur hian a che rang hle.

Tun season Premier League match 12-a inlana a goal 10-na khungtu Costa hian Pedro, Marcos Alonso leh Hazard te tan goal khungna hun ṭha a siamsak bawk - thla 18 liam taa Chelsea-in Premier League nomawi an chawi theih nana goal 20 khungtu striker chet ṭhat hi Blues tan a pawimawh chho zel ang.

Eng nge an sawi?

Middlesbrough manager Aitor Karanka chuan, "Inkhelh hmain team ṭha bik kan hmachhawn dawn tih hre sa mah ila a chak lo zawka ṭan chuan rilru a hnual duh hle. Arsenal (0-0) leh Manchester City (1-1) kan hmachhawn hnuah khan inrintawkna nasa tak kan neih belh a, team ṭha tak pawh hmachhawn turin kan tling tawk tih kan pho chhuak. Zaninah erawh kan tihsual pakhat vangin kan tuar a, mah se tun hnaia kan khelh dana kan khelh reng chuan match tam zawkah hnehna kan chang ang. Hma kan sawn ve zel a ni," tiin a eng zawngin a thlir.

Chelsea manager Antonio Conte chuan, "Boro hi team
ṭha leh khel ṭha tluang tak an nih avangin game harsa tak kan hmachhawn dawn tih ka hria a, chutihrual erawh chuan point thum hlawhchhuah hi kan phu a ni. Goal kan khung a ni mai lo a, goal dang khung theihna hun ṭha pawh vawi tam kan nei a ni. Inkhel ṭantir minute nga vel kha chu kan khel chhia a, mah se insiamṭha thuaiin hnehna kan chang leh thei a ni," tiin an result-ah a lawm thu a sawi.

Inkhel Chhehvel

• Chelsea hian Premier League-ah match ruk chhung goal chhuah loin hnehna an chang tawh - Premier League-ah hetiang hi vawi 10 a thleng tawh a, Chelsea hian vawi nga an tawng tawh bawk.

• Tun season Premier League-a goal 10 khung thei hmasa ber chu Diego Costa a ni.

• Costa-a'n Premier League-a khualmuala match a khelh hnuhnung pasarihah goal sarih a khung tawh.

• Swansea (2) chu tun season Premier League-a an khelmuala point hlawh chhuak tlem ber an ni a, a dawttu chu Boro (4) an ni.

• Boro (5) hi Hull leh Swansea nen Premier League-a mahni khelmuala goal khung tlem ber an ni rih.

• Boro winger Adama Traore-a'n vawi 12 lai dribble hlawhtling a nei a, tun season Premier League-a match khata heti zat dribble complete thei hmasa ber a ni.