Ronaldo-a'n Ballon d´Or phu a inti

Real Madrid forward Cristiano Ronaldo chuan khawvela football thiam ber chawimawina Ballon d´Or 2016 dawng tura tih tur zawng zawng chu ti vekah a inngaih thu a sawi.

Ronaldo hian season hman zawh takah khan inelna hrang hrangah match 48 khelin goal 51 a khung a, Champions League match 12-ah goal 16 khungin Real Madrid chu nomawi a chawipui a, Euro 2016-ah captain armband hreng chungin Portugal chu a champion pui bawk.

Kum 31-a upa for-ward Ronaldo chuan, "Ballon d´Or dawng tur hian ka tih theih zawng zawng chu ka ti vek a ni. Champions League-ah nomawi ka chawi a, Portugal nen Euro-ah ka champion bawk. Vote tla tur hi ka ngaihdan vanga thlak theih a ni lo a, Ballon d´Or chawimawina dawn erawh ka duh a ni. Season hman zawh tak kha ka tan chuan kum duhawm bik a ni a, nomawi hlu tak tak ka chawi a ni," tiin a inringtawk hle.

Madrid Derby-a Atle-tico Madrid laka hattrick siam zo hlim Ronaldo hi zanin dar 1:15-a Real Madrid-in Champions League match khel tura Sporting Lisbon an len-chilh hunah amah chher liantu club hi a hmachhawn rin a ni a, hnehna an chang thei a nih chuan last 16 an lut chiang ang.