MPL5 'quarterfinal' - November 24 zan.

Chhinga Veng - relegate, Relegation playoff, semifinal?

MPL5 match hmasa berah Chhinga Veng an chak a, Chanmari West lakah goal hnih an khung avangin hmahruaitu an ni nghal. Amaherawhchu MPL kaithar club hian chak hmel hmu leh turin match riat an mamawh a, tun season-ah West Warrior an hneh nawn thei a nih chuan semifinal an lut dawn.

An fak mah mah

Chhinga Vengin player hming langsar Lalrozama Fanai, MS Dawngliana, Ronald Zothanzama leh player ṭha engemaw zat an lakluh bawk avangin champion rinkaia sawi an ni. Amaherawhchu MPL ṭan hmain Rozama'n club a chhuahsan bakah Dawngtea leh Ronald te bakah an player engemaw zat inhliam vangin an khel thei lo. Chhinga Veng an fak vak a, an fak chhan ber an player-te an khelh leh si loh avangin beisei ang result an nei lo.

MPL kaitharin MPL harsat­zia an hre chho a, an talbuai avangin player-te harsatna belhchhah turin position nghet an siamsak thei lo bawk. Chhinga Veng tana la inlan kim vek Vanlalthanga'n centre back, left back, centre midfield leh left wing-ah a khel vek tawh!

Aizawl DFA hnuaia First Division an khelh laia winger ṭha Lalthlamuana a position pangngai bakah left back leh right back-ah chhawr a ni a, Isaac Lalremruata chu right back leh attacking midfield-ah chhawr niin player-te'n khelhna nghet an nei lo.

Chhinga Veng hi coach Lalremtluanga hnuaiah vawi khat an chak lo hman a, coach thar Chawngthansanga hnuaiah a zawnin vawi li an chak lo bawk.

Thil mak chu

Chhinga Veng hi round khat­nanaa pakhatna an nih hnu­ah pahnihnaah an tla thla a, hnungtawlh zawng zelin an kal a ni ber. Phase 1 khelh zawh a nih meuh chuan MPL kaithar hi relegation playoff khel thei dinhmunah an ding tawh a, Round 8 zawhah chuan table mawngphahah an awm hial.

MPL kaithar hian match hnuhnung pangaah chak loh an nei lo a, point 11 an hlawhchhuah bawk avangin tunah chuan semifinal khel thei dinhmunah an ding leh tawh.

Chhinga Vengin harhtharna an chan theih nan Nigerian defender Emma Chigozie chu player pawimawh a ni a, MPL3 best defender hi season tir lama inhliam vanga inlan thei lo K. Lalthlahlova (Patea) nen an inkawp fuh hle. Tunah chuan Chhinga Vengin player chhawr bik an nei tawh a, Emma leh Patea te sirah hian Lalramfelpuia leh R. Laldinliana ten hmun nghet an chang bawk.

MPL kaithar tana player pawimawh bera chhal theih erawh MS Dawngliana a ni a, Bawngkawn tlangval hian match thum a zawna goal khungin team chhungah harhna a rawn thlen.

Chhinga Veng tana thu lawm­awm chu Lalkhaw-pui­mawia a dam tawh a, Kelkang tlang­val hian Dinthar an hneh ṭumin chakna goal a khung. MPL kaithar hian Chanmari West an hmachhawn hunah hrem vanga match hnih inlan tawh lo H. Lalmuankima an chhawr thei tawh dawn bawk.

Ngaihnawm

• Chhinga Vengin player 28 zet MPL5-ah an chhawr tawh.

• Lakhawpuimawia'n goal li khung tawhin club top scorer a ni.

• Minute per goal anga chhut chuan Zonunsanga Hmar-in minute 58 danah goal khat a khung a, amaherawhchu Champhaiah chiah Zonuna hi a inlan. Inhliam vanga minute 87 chiah la inlan Ronald Zothanzama'n goal khat a khung tawh a, goal thum khung tawh Dawngtea hi minute 171 dana goal khat khung zel ang a ni.

• Chhinga Veng keeper R. Lalhmangaihzuala'n match li clean sheet a nei tawh a, Lengpui tlangval Lalhmaa hi Chanmari an hmachhawn ṭuma a mualpho hnuin a insiamṭha leh tawh hle.

Point khat mamawh Chanmari West

Mizoram Premier League Season 5 match hmasa pasarihah Chanmari West FC-in point 13 an hmu a, Cham-phaiah Aizawl FC an hneh bawk avangin West Warrior hi semifinal lut ngei tura ngaih an ni.

Coach HC Zarzoliana hoten cham-pion ngei tumin midfielder Reuben Zosangpuia leh forward PC Lalawmpuia te an lalut a, phase 1 aiin khel hmuhnawm sawt mah se an point hlawhchhuah erawh a beitham hle.

West Warrior hian match hnuhnung paruk aṭangin point ruk chiah an hmu a, semifinal thleng pha turin Chhinga Veng lakah point an hlawhchhuah ngei ngei a ngai tawh.

Eng nge fuh lo?

West Warrior tlarhnungah R. Lal-awm-puia (Mapuia) leh Toky Zomuanpuia te an inkawp char char a, defence lai inkawp fuh ber zinga mi an ni. Round 9-a Bethlehem Vengthlang an hmachhawn ṭumin Mapuia inhliam vangin a inlan thei lo a, match ruk chhung chak loh hmel an hmuh loh hnuah West Warrior-in point an hmu lo.

Coach Zara'n Phase 1-ah Lalmuan-sanga, Lalbiakhlua, K. Lalnunzama leh Lalmuanzuala-te midfield-ah a thlak kual a, squad tihchak nan Phase 2-ah Reuben a lak belh. West Warrior hian an khelh dan phung an bel tawh kha an zir ṭha leh a ni ber a, MPL2 best midfielder Reuben hoa Chhinga Veng an hneh a nih chuan Dinthar tlangval hi semifinal chinah chuan a ṭangkai tawh si ang.

Zobawk tlangval H. Lallianzama'n MPL5-ah goal la khung lo mah se player pawimawh a ni. Lianzama hi match hnuhnung pahnihah a inlan thei lo a, Zo United forward hlui hi awm se chuan Chanmari FC leh Zo United lakah result ṭha zawk an hlawh theih ngei a rinawm.

Chhan sawi tur awm bawk mah se Chanmari West an vanduai tih phat rual a ni lo a, BVT an hneh loh ṭumin woodwork vawi thum zet an pet per a, an vanduai. Hemi zawh hian Aizawl FC lakah game hmuhnawm tak khel leh mah se an goal khung ṭum hnih pawm a ni lo a, 0-1 in an chak lo zui bawk.

Ngaihnawm

• Chanmari West-in MPL5-ah player 21 chiah an la chhawr.

• Defender Toky Zomuanpuia'n minute zawng zawng a la khel kim vek.

• Keeper Lalruatpuia'n clean sheet vawi li a nei tawh.

• Laldampuia'n goal riat a khung tawh a, minute 142 dana goal khat zel khung ang a ni.

• Chanmari West-in goal 15 an chhuah a, an chunga awm pathum Chanmari FC, Bethlehem VT leh Aizawl FC te chiah an tluk lo. Hei hian result ṭha nei turin tlarhnung a phui ṭhat a pawimawh tih a tilang chiang hle.

• Chanmari West leh Chhinga Veng ten goal 18 ve ve an khung tawh a, West Warrior goal hnih erawh an khingpuite khung sak a ni.