US-in an coach Klinsmann ban

Germany player leh coach hlui Jurgen Klinsmann chu United States coach aṭanga ban a ni.

Kum 52-a upa Klinsmann hian a inkhelh hun laiin FIFA World Cup-ah Germany chu kum 1991 khan a champion pui tawh a, United States coach hna hi kum 2011 aṭangin a chelh ṭan.

United States Soccer Fede-ration president Sunil Gulati chuan, "Russia rama 2018 FIFA World Cup khel turin player kan nei ṭha tawkah kan la ngai reng a, amaherawhchu tuna kan team khelh dan leh kan hmasawn dan thlirin kawng dang kan zawn a ṭul ta a ni," tiin result neih ṭhat loh vanga Klinsmann an ban thu a sawi.

Klinsmann hian 2014 FIFA World Cup-ah Portugal chungah an awmin knockout stage an lut a, Last 16-ah Belgium an hneh lo. 2018 FIFA World Cup qualifier khelh mekah United States dinhmun a ṭha lo a, harsatna nei loin fifth round thleng mah se match hnih khelh tawhah Mexico (1-2) leh Costa (0-4) an hneh lo.

Team paruk awmna CON-CACAF fifth round aṭangin team pathumin Russia pan theihna ticket an nei dawn a, palinain continental playoff an la khelh dawn bawk avangin point la hmu lo United States tan beisei tur erawh a la tam hle.

US football hotu Gulati chuan sawi chhunzawmin, "March thla tawpah qualifier kan khelh chauh avangin insiamṭhatna tur a la tam hle. World Cup a zawna vawi riat kan khelh theih nana hmalak hi kan tihtur chu a ni," tiin FIFA World Cup an ngaih pawimawh thu a sawi.

Beisei pha lo Klinsmann

Jurgen Klinsmann-a'n kum 2004 khan Germany hna chelh ṭanin 2006 FIFA World Cup an thlen ṭumin semifinal-ah Italy hneh lo mah se football hmuhnawm an khelh avangin German coach hi a hnathawhah an dan sang hle. German football thuneitu sang DFB-in contract thar an chhawp sak a hnar hnuah Klinsmann hi kum hnih awlin July, 2008-ah a club hlui Bayern Munich zawmin a hlawhtlin loh avangin an ban.

United States-in beiseina sang tak nen Klinsmann hi an thlir a, amaherawhchu Germany angin US-in player an neih ṭhat ve loh avangin game mawi a khelhpui thei lo. German coach hian team ṭha a din a tumna lamah German-American player US team-ah a senglut mah se a besei loh ang thil a thleng - heng player leh American player te inkarah a buaina awm.

England coach atana sawi rik hman Klinsmann hi kum 2013 khan CONCACAF Coach of the Year-ah thlan ni mah se tunah chuan result ṭha neih loh vangin ban a ni.