FA Cup a pawimawh - Arteta

Zanin dar 1:30 hian Arsenal chuan FA Cup fourth round khel turin Bournemouth an tlawh dawn a, manager Mikel Arteta chuan inelna an ngaih pawimawh tak a nih thu a sawi chhuak.

Gunners hi Premier League lamah beisei an phak lo a, Europa League lamah la dam bawk mah se an tan FA Cup champion nih chu club lian dangte elphak an nih zia lantir theihna tur kawng pakhat a ni. Arsenal manager Arteta chuan, "Inelna zawng zawng kan ngai pawimawh vek, chutih rualin he club tana FA Cup hlutna ka hria. Eng inelna pawh ni se hnehna chan a pawimawh, chutiang tur chuan theihtawp kan chhuah ang," a ti.

 

Arteta hian a striker leh captain ni bawk Pierre-Emerick Aubameyang leh Barcelona sawi zawm a nih chungchang chhangin, "Emirates Stadium-ah a hlim thu min hrilh," tiin a sawi a, a la cham zel dawn tiin a ngaih theih. 

North London club hi tlarhnung player hliam vangin an buai mek, tun thlasik bazar chhungin defender thar neih ngei an tum. Brazilian club Fla­mengo aṭangin defender Pablo Mari chu loan hmanga hawh an tum a, tunkar chhung hian inremna an nei hman ang.