Rostov hmachhawn thei lo tur Neuer

Bayern Munich chuan zanin dar 10:30-ah Champions League group match khel turin Russian club FC Rostov an lenchilh dawn a, he hunah hian an goalkeeper chhuanvawr Manuel Neuer chu hliam vangin a inlan thei dawn lo.

German champion hian twitter lamah kum 30-a upa keeper inlan theih loh tur thu hi tarlangin, "FC Rostov nena inhmachhawn turin Bayern Munich chu kan zin chhuak dawn a, mah se he hunah hian goalkeeper Manuel Neuer chu chawn hliam vangin a zin ve thei dawn lo a ni," an ti a, kum 28-a upa Sven Ulreich chu Neuer aiawh tur hian beisei a ni.

Bayern Munich hian Champions League group stage-ah match hnih khelh hmabak la nei mah se Atletico Madrid hnuaia awm chungin Spanish club nen hian last 16 an lut chiang tawh a, team pahnih tana pawimawh tur chu last 16-a team
ṭha pumpelh tura Group D hmahruaitu nih a ni.

Madrid Derby-a Real Madrid laka mualpho hlim Atletico hian zanin dar 1:15-ah PSV Eindhoven an mikhual dawn. Diego Simeone naute hian Ba-yern meuh pawh vawi hnih hneh tawhin Champions League match vawi li an khelh tawhah tlawm hmel an hmu lo a, chak hmel la hmu ve lo Dutch club PSV tan Real laka chak lo thinrim hlim club hmachhawn hi a chakawm lo ang.