Malaysia GP a tawp dawn

Formula 1 Malaysian Grand Prix chu kum 2018-ah a tawp dawn. Sepang International Circuit-ah hian kum 1999 aṭang khan Formula 1 intlansiak hi neih ṭan a ni a, an contract neih lai a tawp hnuah pawh sei an tum tawh lo.

Kumin October thla khan Malaysian Grand Prix hi tlan niin Red Bull driver Daniel Ricciardo chuan hnehna a chang, Sepang-ah hian mipui 120,000 zet tan a hmuna enna awm mah se mi 45,000 vel chauh an pungkhawm. Mipuiin an hlut tawk loh vang leh Aisa khawmualpuia Formula 1 intlansiakna tlan kawng dang a awm ve tawh avangin tih chhunzawm an tum ta lo a ni.

Malaysia tourism minister Nazri Abdul Aziz chuan, "Hun rei tawh tak aṭang khan kan dinhmun hi zir chian a lo ni tawh a, mipuiin kan hlut dan leh a hlawkna te ngun taka chhut a nih hnuah intlansiak thleng chhunzawm zel lo turin thutlukna kan siam," tiin a sawi.

Kuminah Formula 1 intlansiak hmabak pakhat a la awm a, November 27 khian Abu Dhabi Grand Prix tlan a ni ang. Driver championship-a hmahruaitu Nico Rosberg leh amah hnaih bertu leh champion lai ni bawk Lewis Hamilton te inthlauhna chu point 12 chiah a nih avangin Mercedes driver pahnihte hi champion thei ve ve an la ni.