Highlanders tan insiamṭhat hun

NorthEast United-in Indian Super League-ah bul ṭan ṭha viau mah se an match hnuhnung parukah chak hmel an hmuh loh avangin table hnuai ber dawttuah an awm tawh! Portugal boss hlui Nelo Vingada enkawlna hnuaia khel Highlanders hian zanin dar 7-ah Pune City an mikhual dawn a, semifinal luh an tum a nih chaun chak loh neih a thiang tawh lo.

Highlanders hian an match hnuhnung berah Atletico de Kolkata chu khualmualah an inhnehtawkpui a, an khelmuala an match hnuhnung pathumah Chennaiyin FC, ATK leh Mumbai City an hneh lo bawk - Portuguese manager Vingada chuan an khelmuala harhtharna chang turin fans ṭawiawmna chu thil pawimawh tak a nih thu a sawi.

Asian Cup-a Saudi Arabia lo champion pui tawhtu coach chuan, "NorthEast United fan-te kan inkhel en turin ka sawm duh a, zanin kan inkhel tur hi match pawimawh tak a nih avangin anni puihna hmanga hnehna chan ngei hi kan duh a ni," tiin Indira Gandhi Athletic Stadium, Guwahati -a an inkhel tur chu tun hma aia nasa zawka ṭawiawm turin fan-te a ngen.

NorthEast United-ah hian Mizo rawlthar Lallianzuala Chhangte, Jerry Mawihmingthanga leh Lalrempuia Fanai te an awm a, Portuguese manager hnuaiah khelhna hmun an chang meuh lo. Pune City hian Armed Veng tlangval Zodingliana Tochhawng an kawl ve bawk.

Team Dinhmun

Team Pld W D L GF GA GD Pts

Mumbai City 12 5 4 3 14 8 6 19

Delhi Dynamos 11 4 5 2 21 14 7 17

Atlético de Ko… 11 3 6 2 13 12 1 15

Pune City 11 4 3 4 12 13 -1 15

Kerala Blasters 11 4 3 4 9 13 -4 15

Chennaiyin 11 3 5 3 13 15 -2 14

NorthEast United 10 3 2 5 8 9 -1 11

Goa 11 3 2 6 8 14 -6 11