West Brom-in an mikhual Burnley an sawp

Thawhṭanni zan khan Premier League inkhel pakhat a awm a, West Brom chuan first half-ah goal thum khungin an mikhual Burnley chu 4-0 in an sawp.

West Brom tan hian Matt Phillips (4'), James Morrison (16'), Darren Fletcher (37') leh Salomon Rondon (64') ten goal an khung a, an khingpui goal zawna vawi ruk an pet zinga vawi li zet a lut. West Brom khelmual Hawthorns-ah Burnley hian record an nei chhe hle a, kum 1969 hnu lamah ṭum 10 lenglut tawhin chakni hmel an la hmu lo, vawi kua ngawt an chak lo.

League match 12 khelh aṭangin West Brom hian point 16 hmuin table-ah pakuanaah an kai chho a, hetihlai hian Burnley erawhin point 14 chiah an la neih avangin 12-naah an tla thla thung.

Baggies boss Tony Pulis chuan, "Kan lungawi, team khawng tak hmachhawn mah ila a hunah tak goal kan khung theih avangin a harsa lo. Manchester City kan hneh loh hnuah a zawnin point thum kan hmu ta a, ka nauten inrintawkna an nei ṭha hle," tiin a sawi.

Burnley manager Sean Dyche chuan, "A bik takin first half kha kan khel ṭha lo a, kan insiamṭhat meuh kha chuan goal thum kan phur tawh a, a harsa tawh hle a ni. Tunah chuan Hull City nen inkhel hautak tak hmachhawn tura kan inbuatsaih leh nghal a ṭul," tiin Hull nena an inhmachhawn tur a thlirlawk.