Bellerin-a'n contract thar ziak

Arsenal defender
ṭhang duang Hector Bel-lerin chuan a club tana a rinawm zia lan--tir nan contract thar a ziak. Gunners-in Spanish wing back contract rei zawng hi official-in tarlan lo mah se British media lam chuan kum 2022 thleng Emi-rates Stadium-a cham turin contract a ziak niin an tarlang.

Bellerin hian kum 2011 khan Barcelona hi a zawm a, kum 21 leka upa ni mah se season liam ta aṭang khan Arsene Wenger-a player pawimawh a ni. Season hmasa khan a club tan hian inelna hrang hrangah match 44 khelin a ṭhiante goal khung tur vawi kua a siam sak bawk. Assists neih tama a tluk loh chu forward Alexis Sanchez leh midfielder Mesut Ozil te chiah an ni.

Kum naupangte ni mah se khelmual chhungah a puitling tawh a, 2015/16 PFA Team of the Year-ah telh a nih bakah Euro 2016 khel tur Spain squad-ah telh a ni bawk. A club hlui Barcelona leh league lama an elpui Manchester City ten an ngahven nia sawi awm hman mah se contract a pawhsei leh takah chuan London club hi tun hnai maiah chuan a chhuahsan lo ang.

Arsenal tana match 67 khel tawh Bellerin chuan, "He hmunah hian kum nga aia rei ka awm tawh a, tunah chuan ka in a ni. Contract thar ka ziak thei hi ka lawm a, khawvela a ṭha berte zinga mi ni thei tura thawhrim hi ka duh a ni. Arsenal tan nomawi chawi zel ka duh," tiin a sawi.