Warriors an chak zel

NBA regular season kal mekah Golden State Warriors chuan a zawnin match riat chhung hneh loh nei loin an kaltluang leh ta. Nimin zing khan Klay Thompson chuan Indiana Pacers lakah point 25 score-in Stephen Curry chuan point 22 a thawk chhuak ve bawk a, inkhel bulṭan aṭanga a tawp thleng hmahruaitu niin 120-83 in hnehna an chang.

Warriors coach Steve Kerr chuan, "Ka nauten an khel ṭha hle a ni. Kan inven uluk bakah a ṭul hunah na takin kan nawr thei a, tih sual leh a fuh tawk lo lai chu awm mah se hma kan sawn zel," tiin a sawi.

Golden State tan hian Kevin Durant chuan point 14 a neih bakah rebounds vawi 11 a la bawk a, a vai hian an lama ball awm laia a lak a ni nghe nghe. American star hian assist vawi ruak a neih bakah blocked shots leh steals vawi hnih ve ve a nei bawk.

Oklahoma City aṭanga Warriors zawmtu Du-rant chuan, "Kan zavai hian hmasawnna tur kan la nei vek a, kan theihna sang ber ti lang tur chuan thawhrim zual a ngai," tiin season hmasa NBA Finals-a chak lo zawk team hian an theihna sang bera an la khelh chhuah loh thu a sawi.

Warriors hian an match 15-na atan Ningani zing dar 9:00 hian Los Angeles Lakers an lo mikhual ang a, Indiana Pacers hian Atlanta Hawks an hmachhawn ve leh bawk ang.

Inkhel dangah San Antonio Spurs chuan a zawna an vawi ruk chakna ni turin Dallas 96-91 in an hneh. Spurs tan hian Kawhi Leonard (24 points), Patty Mills (17) leh Pau Gasol (16) ten an thawhhlawk hle. Spurs hian tun season-ah match 11 hnehna chang tawhin ṭum thum an chak lo thung - Ningani zingah Charlotte Hornets an hmachhawn leh ang.