Chungnung zawk nih inchuh Arsenal vs Paris Saint-Germain
Champions League Group A aṭangin Arsenal leh Paris Saint-Germain ten last 16 an lut chiang tawh a, club pahnihte hi zanin dar 1:15 hian Emirates Stadium-ah an intawng dawn. Knock out stage-ah group hmahruaitu hian group lehlama pahnihna an hmachhawn ṭhin a, team
ṭha zawk nia ngaih pumpelh theihna hun a nih avangin club pahnih tan inkhel pawimawh a ni - chetsual a la thiang lo.
Arsenal leh PSG te hi Sep-tem-ber 12 zan khan Parc des Princes-ah an group match hmasa ber atan an lo intawng tawh a, goal khat ve ve khungin an inhnehtawk. Inkhel ṭan aṭanga second 42-na leka Edinson Cavani goal khung chu second half-ah Alexis Sanchez-a'n a sut a, hun tawp dawnah Olivier Giroud leh Marco Verratti te hnawhchhuah an ni.
A pawimawh
Arsenal-in kum 17 chhung zet chu a zawnin Champions League group stage an khel tawh a, final vawi khat an khel tawh. Tun hnai kum ruk chhung bikah last 16 an lut ziah a, hengah hian Barcelona leh Bayern Munich te chu
ṭum hnih an hmachhawn bakah AC Milan leh AS Monaco an hmachhawn bawk - vawikhat-mah quarterfinal an lut lo!
Laurent Blanc kaihhruaina hnuaiah PSG-in a zawnin French Ligue 1 nomawi vawi li an chawi thei a, heng kumah te hian Champions League quarterfinal an lut vek, hei aia sang erawh an thleng thei bik lo. Sum ngah French club hian Europe-a hlawhtlin an duh avangin a zawna season thum chhung Europa League nomawi chawi thei Sevilla coach Unai Emery an lalut.
Arsenal hian point 10 hmuin group hmahruaitu ni mah se PSG nen an point a inzat a, an inthlauhna chu goal difference chiah a ni. Premier League leh French Ligue 1 lama club lian pahnih hi European competition-ah tun dinhmunah chuan an la lian tawk lo a, club ropui dangte sulhnu ang nei ve tur chuan zanin aṭangin an chet ṭhat a pawimawh.
Gunners hian an match hnuhnung berah Swiss club Basel an lenchilh dawn a, PSG hian table mawngphah a awm Ludogorets an hmachhawn ve thung ang. An hmabaka an khelh tur hi tla chiang tawh leh team nem zawka ngaih an nih avangin hmahruaitu nih duh tan chuan an intawnnaa chak zawk nih a ngai.
Arsenal an tluang
Season ṭan niah Arsenal hi an khelmualah Liverpool chuan 4-3 in an hneh a, an mualpho chiang hle. Wenger-a nauten hemi hnuah an hloh chu hlepah chhiarin inelna hrang hrangah match 17 chhung zet chu hneh loh nei loin an kaltluang mek a, match 12-ah hnehna an chang thei.
Gunners hian match riat an khelh aṭanga vawi sarih ngawt goal an chhuah loh hnuah tun hnaiah an tlarhnung a phui tawk lo a, an match hnuhnung paliah goal chhuah vekin Tottenham leh Manchetser United laka hnehna chang zo lo hlim an ni.
Striker palian Olivier Giroud a dam chiang tawh a, inelna hrang hrangah ṭum hnih chiah inkhel bul a la ṭan nachungin goal li a khung leh tawh. Alexis Sanchez leh Theo Walcott ten Premier League leh Champions League-ah goal riat an khung tawh a, Mesut Ozil-a'n goal sarih a nei tawh bawk.
Spurs an hmachhawn
ṭuma inhliam defender Hector Bellerin chu chawlhkar li chhung a chawlh a ngai dawn a, playmaker Santi Cazorla chu a lo kir a la bei--seiawm loh bawk. Anni pa-hnih bakah hian captain Per Mer-te-sacker, Danny Welbeck, Chuba Akpom leh Lucas Perez ten PSG an hmachhawn thei lo ang.
PSG an ṭha tawh
Season tirah Ligue 1 champion PSG-in beisei an phak lo a, an match hmasa parukah ṭum hnih chiah hnehna an chang. Tunah erawh Spanish manager Emery-a'n a naute a duhdanin a khelhtir thei tawh a, an match hnuhnung pakuaah ṭum riat hnehna changin chak loh an nei lo - Gunners nena an intawn hmasak nena khaikhin chuan team ṭha zawk an ni tawh.
Striker rinrawl Zlatan Ibra-hi-movic awm loh hnuah Edinson Cavani chu player pawimawh bera chhal ngam a ni. Uruguay international hian league match 11 a khelh aṭangin goal 11 a khung tawh a, an match hnuhnung bera Nantes 2-0 a an hneh ṭumin hahchawlhtir a ni bawk. Gunners tan first leg-a goal khungtu bawk hi ven ngun ngai bik a ni leh dawn.
PSG hian tun season kal meka inelna hrang hrangah match 18 an khelh aṭangin
ṭum hnih chiah goal khung loh an nei a, Arsenal tlarhnung phui tawk loh lai a nih avangin an khingpui tur hi an huphurh hran lo ang. Midfielder Adrien Rabiot chu international match-ah a malpui a tih nat a vangin a dinhmun a chiang lo a, defender Layvin Kurzawa hliam a la dam lo bawk.