Ramsanga & Ṭhazuala ten India tan medal la dawn

Yonex-Sunrise BWF World Junior Championship 2025 khelh mekah India badminton team chuan semifinal an lut a, chak lo pawh ni se bronze medal an lak dawn tho avangin medal an la dawn tih a chiang tawh.

India team-ah hian men's doubles leh mixed doubles-ah C. Lalramsanga inlanin, Durtlang rawlthar hi badminton thiam ram India tan player pawimawh a ni phak a, singles-ah H. Lalṭhazuala a inlan ve bawk.

Mizo shuttler pahnih hi world championship-ah Mizo inlan thei hmasa ber an ni a, medal la thei hmasa ber an ni leh dawn ta!

National Centre of Excellence, Guwahati-a neih inelnaah hian team angin inelna hi neih hmasak a ni a, India hi group H-ah Hongkong, China, Nepal leh Ghana te nen an awm ho - group hmahruaitu chu quarterfinal lut tur an ni.

Team inelnaa seeded no.2 ni phak India hian an elpui ramte hi straight set (2-0) veka hnehin tlawm an nei lo a, group hmahruaitu ni chungin quarterfinal an lut chiang hle.

India hian quarterfinal-ah badminton thiam ram South Korea an hmachhawn zui a, set khatna hi South Korea-in 45-44 in la mah se, India hian 45-30 leh 45-33 a set hnih dang lain, 2-1 in an chak a, semifinal an inhlapkai zui.

Durtlang rawlthar Ramsanga chu India tan player pawimawh a tling phak - mixed doubles chauha inlan tura thlan ni mah se, tournament takah hian men's doubles-ah pawh khelhtir a ni a, coach-ten a kawppui tur duh an thlantir thlap!

Ramsanga hian mixed doubles-ah Aanya Bhist a kawp deuh ber a, Vishakha Toppo a kawppui zeuh zeuh bawk - mens doubles-ah Bhargav Ram Arigela nen inkawp bawkin, mixed doubles-ah Aanya Bhist nen vawi khat an tlawm tih loh chu a khingpuite hnehna a chanpui vek.

Group stage match-ah H. Lalṭhazuala chu singles-ah inlanin, a khingpui a hneh vek a, mahse, Chanmari West tlangval hi quarterfinal-ah erawh hahdamtir a ni thung.

Mizoram Badminton Association secretary general Dr. K. Vanlaldinpuia chuan, "Tata Trust te nena kan thawhhona vang liau liaua tun dinhmun hi thleng thei kan ni. Annin grassroot training leh Regional Competitive Training Centre (RCTC) te min tihpui a, state sorkar chungah pawh lawmthu kan sawi," tiin Vanglaini a hrilh.

India hian vawiinah semifinal khelin, Chinese Taipei laka 2-0 a chak thei Indonesia an hmachhawn dawn - final an luh chuan, semifinal lehlama Japan leh China inkhela chak zawk an hmachhawn leh ang.