Inter Village Volleyball: Thenzawl leh Bungkawn ten final an lut

Mizoram Volleyball Association (MVA) buatsaih - GIG Motors Inter Village Volleyball Tournament chu a hmawr bawk a hnai, nizan khan hmeichhe semifinal pahnih khelh zawh niin, Thenzawl leh Bungkawn ten final an inbeng tling.

Vawiin tlai dar 4:00 hian hmeichhe final khelh zui nghal a ni dawn a, team ṭha pahnih Thenzawl leh Bungkawn inkhel tur hi a hmuhnawm ang a, a hmuna entu pawh an ṭhahnem tawhin a rinawm, khelmual pawn aṭanga ṭantu neih ṭhat a pawimawh dawn a ni.

R. Dengṭhuama Indoor Stadium, Mualpuia inkhel hmasa zawkah Thenzawl hian Thingdawl VC-I chu 25-12, 23-25, 22-25, 25-11, 15-10 (3-2) in an hneh. Team pahnih an inkhel tawk hle, set hnuhnung berah pawh an insan chhawk zak zak a, a tawpah erawh Thenzawl hian a zawna point nga hmuin an chungnung ta a ni.

Inkhel hnuhnung zawkah Bungkawn chuan 15-25, 25-22, 15-25, 25-18, 15-9 (3-2) a Dawrpui Vengthar hnehin final an invaw kai ve bawk a, inkhel inhnehtawk takah a vannei zawk an ni.

Semifinal hmasa ang bawkin a hnuhnung zawk pawh a hmuhnawm, tu zawk mah an kal fal hleithei lo. Set hmasa pali chu an insem phawt a, final lut zawk an awm a ngaih avangin set ngana hmanga chinfel a ngai.

Set hnuhnung berah Bungkawn an che fuh hmasa, 6-1 in an sang phawt. Time out an hman hnuah pawh Bungkawn lamin point an hmuh belh leh ta zawk a, F. Lalparmawii chuan a zawnin a rawn hlap tla leh pawp.

Dawrpui Vengthar lamin thapui an thawh a, ball a tlak ai chuan tluk pawh an huam - point pawh an hlawh chhuak nual. Mahse, Bungkawn an kal fal thui tawh a, a khat tawka point hmuh belh zauh zelin, a tawpah an chungnung ta zawk a ni.

Nizan khan mipa semifinal match pahnih khelh a ni a, result kan hre hman lo. Khawhai leh ITI Veng inhmachhawnin, inkhel pakhat zawkah Nursery Veng leh Hunthar te an inhmachhawn bawk a, zaninah a hmawr bawk a ni ve bawk ang.