AFC chakna Khawbel goal machine

10th October, 2025

GIG Motors MPL12-ah Aizawl FC-in nimin khan MLS FC 4-1 in an hneh a, I League club tan Zomuansanga'n hattrick a siam. Khawbel goal machine hian goal 13 a khung tawh a, MPL4-a F. Lalrinpuia goal khung zat nen intluk chiahin season khata goal khung tam ber record siam turin goal khat chiah a mamawh tawh.

R. Lalruatfela kaihhruai AFC hian point 29 an hmu tawh a, season khata point hmu tam ber record siam thei dinhmunah an la ding zel. MLS erawh coach thar Lalruatliana Sailo (Tawia) hnuaiah chak loin bul an ṭan a, semifinal beiseina rawh la nung zel thung.

Zomuana a 'cial'

Aizawl FC-in bul an ṭan ṭha a, Zomuana'n minute riatna lekah goalkeeper Lalvanlawma'n hla tak aṭangin a pet khum a, tun season-a goal mawi ber zinga mi a ni. I League club hian penalty hmuin Zomuana'n goal-ah a chantir a, minute 22-naah 2-0 a ni der.

I League club-in goal tam zawk an khung dawn niin lang mah se goal dang hmuh tur a awm mai lo a, MLS lam an insiamṭha chho bawk. Second half ṭan chiahah MLS tan Ricky H. Vanlalhriatanga'n siphurh a sut ṭhen a, minute 46-naa goal hi AFC defender C. Zomuanpuia tihsual vanga goal a ni.

Aizawl FC talbuai an hman a, mahse Zomuana'n chance insiam chawpin minute 60-naah chak nemnghehna goal a khung a, tun season-ah a vawi hnih nan hattrick a siam bawk. Eric Remruatpuia Chhangte-in minute 79-naah a rawn khung belh leh a, 4-1 in hnehna an chang.

MLS hmabak

Southern Blues-in match nga chhung tlawm an nei tawh loh hnuah an chak lo a, chutihrualin table chung bera awm an hmachhawn miau vangin Tawia leh a hote dem theih an ni lo.

MLS hi 4-1 ngawtin tlawm mah se result aṭang ringawt thlir a rem lo. Lawngtlai club-in goal an neih hnuah na takin an nawr a, Aizawl FC goalkeeper Vanlalhriatpuia khel ṭha lo se, siphurh an sut thei ngei ang.

Southern Blues hian SYS FC, Dinthar FC leh Mizoram Police an la hmachhawn dawn a, an hnuaia awm team pahnih an la hmachhawn dawn tih hriat a ṭha. Hei bakah hian an chung chiaha awm Saikhamakawn aiin head to head-ah an ṭha zawk a, an point a inang a nih chuan a chung zawkah an awm dawn.