Saikhamakawn leh Dinthar an intluktawk

GIG Motors MPL12 inkhel boruak a nung chho zel a, Nilaini zan khan Saikhamakawnin leh Dinthar te 2-2 in an inhnehtawk. SKK hian Lalnunzira Sailo leh Kiran Chhetri te hmangin hma hruai mah se Maimawms-in minute thum chhung lekin Samuel Lawmsiamkima leh C. Ramnunpuia te hmangin siphurh an sut.

Saikhamakawn leh Dinthar te hi an inkhelh hmasak ṭum pawhin 2-2 thoin an inhnehtawk a, team pahnih hi point inanga season an khar a nih chuan a chung zawka awm tur en nan goal difference hman a ni ang. Round 11 zawhah erawh Dinthar hian point 19 hmuin SKK aiin point hnihin an la hmu tam zawk.

Coach battle

Saikhamakawnin hrem vangin midfielder JH Remlala an la chhawr thei lo a, mahse bul ṭantu zingah David Lalchhuanawma leh Lallawmsanga te an dah nghal. Melbuk forward Lsa hi Mizoram Police laka goal leh assist nei Francis Malsawmkima aiah thlan a ni a, David hian Remlala a thlak thung.

SKK coach Lalsangzuala Hmarin 4-4-2 formation a rawn hmang a, tlarhmaah David leh goal kua khung tawhtu Suanngaihmuana te an inkawp. Midfield-ah Kiran Chhetri leh Malsawmdawngkima te awmin mual dinglamah Zira awmin coach Sanga'n a player rem dan aṭangin goal khung a ngai pawimawh tih a lang.

Dinthar coach Laldampuia pawhin SYS FC an hneh theih tura MS Dawngliana goal khung tur siamsaktu R. Laldanmawia bench-ah a dah a, striker Lalkhawpuimawia'n (Mapuia) bul a ṭan. Kelkang tlangval Mapuia hi Dawngtea, Tea Chinzah leh Samuel Lawmsiamkima ten an thlawp a, anni pawh attacking game khelh tum tho an ni.

Football hmuhnawm

Mi nawlpuiin hmuhnawm an tih theih dan ang berin SKK leh Maimawms ten football an khel a, goal venhim aiin goal khung an ngai pawimawh zawk. Midfield-a inpek muan vel a awm lo a, a rang thei ang berin an innawr a, tihsual a tam ang bawkin goal chance pawh a tam.

Salem Veng tlangval David-a'n inkhelh ṭantirah club thar tana goal khungna remchang a nei a, box pawn aṭangin kawh zetin a pet a, Dinthar Joel B. Lalramchhana'n a dang ṭha hle. Maimawms lamin an vaw let leh nghal a, awlsam taka SKK tlarhnung an ṭhiah hnuah Tea Chinzah ball pet chuan goal ban a per dawp a, keeper RS Lawmzuala a che hman lo.

Minute ruknaah goal hmuh tur a awm a, David-a ball vawrhluh chu Dinthar left back LH Lalchawimawia'n la thla sualin a per chu Zira tan duhthusam a ni a, Marpara tlangval hian a ke vei lamin kawh zetin a pet lut.

Dintharin na takin an nawr lehnghal a, Samuel-a cross chu Mapuia'n a tauh fuh hman lo. Lalremtluanga (Mamatea) ball vawrhluh ṭha zet pawh Dawngtea'n tauh fuh mah se keeper Rsa'n rang takin a beng chhuak hman.

Dampuia naute game a mawi a, right back Lalsawmpuia vawrhluh chu Tea Chinzah-in fing takin a tauh let a, Dawngtea'n kawh zetin volley mah se mak takin Rsa'n a dang hman. Dinthar hian first half-ah Tea Chinzah hmangin an khung belhah inngai mah se offside vangin pawm a ni lo.

A goal mawlh mawlh

Saikhamakawnin second half-ah bul an ṭan ṭha leh a, minute 48-naah Zira corner pet chu Kiran Chhetri-a'n a tauh lut. Tlangnuam tlangval hian MPL12-ah goal nga a khung der tawh a, midfielder goal khung thei bik hian thui tak thleng turin theihna a nei a ni.

Coach Sanga leh a hote an ngaih a ṭha a, minute 62-na lekah MPL12-a goal kua khung tawhtu Amuana la chhuakin Zonunmawia an luhtir a, thutlukna fuh ber a ni lo. Zonuna luh hnuah SKK-in striker pakhat hmangin midfielder pathum an hmang chiah a, midfield thuam chak hi thutlukna ṭha niin lang mah se an insiamrem hmain Dintharin goal hnih an khung.

Minute 65-naah halfway line aṭanga Tetea Sailo freekick vawrhluh satliah chu Lalhunruata'n tauh chhuak ṭha tawk loin box pawna awm Samuel-a'n vawi khata volley nghalin Joshua Vanlalrinliana Ngente ke a per hnuah goal-ah a lut. Samuel-a volley a ṭha a, chutihrualin a vengtu Jonathan Lallianchawia'n hun thawl a pe thung.

Dinthar an phur chhunzawm a, minute hnih hnuah corner kick aṭangin Tea Chinzah-in siphurh sutna goal a khung. SKK tlarhnung an buai a, chutihrualin Dintharin corner an pet ṭhat bakah player fing Dawngtea'n six yard box chhungah a tih tur a ti ṭha a, Farkawn tlangval Tea Chinzah-in a phu ang ngeiin goal a khung.

Inkhel a hmuhnawm chhunzawm a, Dintharin chak tumin Sialhawk Express an luhtir a, a tawp thlengin a hmuhnawm. Mapuia'n Dinthar tana chakna goal khung theihna remchang a hlah a, Saikhamakawn pawhin corner kick aṭangin goal hlauhawm an nei mah se goal hmuh tur a awm tawh lo.