Gerrard leh Rangers an inbe dawn

Liverpool legend Steven Gerrard chu club enkawl nei loa rei tak a awm hnuah, a club hlui Rangers nen an inbe dawn a, Stevie G hi Scottish club-ah a kir a nih pawhin a mak lo ang.

Rangers hian Pathianni khan an coach Russell Martin an ban a, Martin hmun ruak luah tur hi an dap zui - Gerarrd hi an duhthlan hmasa a ni a, mahse, Gerarrd hian Rangers enkawl leh a hreh leh hreh loh hriat leh phawt an duh avangin an nghak phawt.

Gerrard-a'n Rangers enkawl a hreh lo a, tunah chuan inbiakna an nei dawn ta. Rangers fans tam takin an club enkawl leh tura an duh em em Gerrard hian 2018-2021 inkar khan Scottish club hi a lo enkawl tawh a, kum 10 hnua a vawi khat nan league nomawi a chawipui hial.

November 2021 khan Gerarrd-a'n Aston Villa enkawl turin Rangers a chhuahsan a, Liverpool captain hlui chhuah hnuah Rangers hian nomawi chawi an nei leh tawh lo!

Hetihrual hian Gerrard pawh a coaching zinkawngah a tluang bik lo hle. Villa hi a season hmasa berah 14-na a nihpui a, a season hnihnaah match 12 chiah a kaihruai hman tihin ban a ni.

Villa Park a chhuahsan hnuah Saudi Pro League club Al-Ettifaq a zawm a, mahse, January 2025 khan inhriatthiam tawnnain an inṭhen ve leh bawk. Tunah chuan fans tam takin an âtchilhna hmun Ibrox Stadium-a kir turin a inbuatsaih mek a, a ropuina neih let leh a tum ang.

Gerrard hian tun hnai khan England tana a inkhelhpui ṭhin Rio Ferdinand nen an inkawmnaah club enkawl leh a hreh loh thu a sawi chhuak a, hetihrual hian Stevie G chuan, "Chak tuma inel ṭhin team ngei enkawl ka duh a, chu chu ka inhmeh a ni," a ti.

Kum 45 mi Gerrard hian, "Club panga emaw paruk emaw vel chuan Saudi ka chhuahsan hnuah min dawr tawh," tiin a sawi bawk a, tunah chuan Rangers lamah bawk a puanthuah a tel leh dawn ta niin a lang.

Rangers ban tak Martin khan Rangers hi match 17 chiah kaihruai hmanin, vawi nga chiah a chakpui a, Scottish Premiership table-ah pariatna ni mekin, hmahruaitu Hearts chu point 11-in an phak lo mek - Gerrard-a tan hna a awlsam lo ang.