Arsenal-in Wembley lam an hawi

Premier League hmahruaitu Arsenal chuan Emirates Stadium chei ṭhat an tum a, ṭhutna tam zawk siam belh an tum; an stadium an siam ṭhat chhung hian Wembley Stadium chu khelmual atan hman an tum a ni.

Arsene Wenger hoa Emirates Stadium an sak zawh khan, khatih lai chuan England rama khelmual lian pahnihna a ni, an chungah Manchester United chauh an awm ṭhin.

Tuna Arsenal khelmualah hian mi 60,704 an leng a, club dangin an khelmual an tihlen ve zel avangin tunah chuan Premier League stadium lian pangana a ni ta daih.

Emiarets Stadium ai hian Old Trafford (74,879), Tottenham Hotspur Stadium (62,850), West Ham (62,500) leh Liverpool (61,276) te an lian ta zawk a, a hmuna entu tam zawk an awm theih nan hma an la leh ta a ni.

Highbury aṭanga Emirates Stadium an luahna pawh a rei ta, nakkum hian kum 20 a tling tawh dawn. Arsenal hian Real Madrid khelmual Santiago Bernabeu Stadium anga thuam thar a, tihlen an tum a ni.

Gunners tan Wembley Stadium hi thil thar a ni dawn lo. Kum 1998-99 leh 1999-2000 season pawh khan Champions League khel tura mikhual thlen nan an lo hmang tawh a, hetih lai hian Wembley hi chei ṭhat a la ni bik lo thung.