Quarterfinal-ah Medvedev a lut

Daniil Medvedev chuan Learner Tien lakah phuba lain, hmanni lawka China Open khelh zawh taka a hneh loh hi a hneh let a, harsa angreng takin Shanghai Masters quarterfinal a invaw kai.

Nilaini zan inkhelah Medvedev hi awlsam takin a chak mai bik lo, rawlthar Tien-a lakah hian 7-6 (8/6), 6-7 (1/7), 6-4 in hnehna a chang hram a, semifinal lut tur chuan Alex de Minaur a paltlang leh a ngai dawn a ni.

Russian tlangval Medvedev chuan, "Player ṭha leh hmabak nei êng tak a ni, player langsar bik mi pathum chhiar tel loh chuan hmachhawn harsa ka tih ber a ni hial ang," a ti a, a hneh tak player a dahsang thiam hle.

Inkhel dangah Alex de Minaur chuan Nuno Borges chu 7-5, 6-2 in a hneh a, seeded pasarihna De Minaur hian kumina a vawi hnih nan nomawi chawi a tum mek, a hmabak erawh a hautak chho dawn.

Australian tlangval De Minaur chuan, "Set khatna kha chu kan inkhel tawk em em a, a hnuhnung zawk kha chu a ziaawm hret. Kan kawng lamah hian player ṭha an tam a, match zawng zawng mai hi a hautak vek," a ti.

Arthur Rinderknech pawhin a vawi khat nan ATP Masters 1000 quarterfinal a lut, tun hma lama a thlen ngai loh thleng tur hian Czech Republic player Jiri Lehecka chu 6-3, 7-6 (7/5) in a hneh a, a match lehpekah chuan Felix Auger Aliassime a hmachhawn leh ang.