Inter Village Volleyball 2025: Hmeichhe champion Bungkawn

Mizoram Volleyball Association buatsaih - GIG Motors Inter Village Volleyball Tournament 2025 chu a hmawr bawk a ni a, nimin tlai hmeichhe final inkhel hmuhnawmah Bungkawn chuan straight set hmanga Thenzawl South hnehin an champion. Nizanah mipa final khelh a ni a, Hunthar Veng leh ITI Veng ten nomawi inchuhin result kan hre hman lo.

R. Dengṭhuama Indoor Stadium, Mualpuiah Bungkawn an chungnung, final boruak ngam taka khel chungin an khingpui Thenzawl South hi 25-16, 25-14, 25-16 (3-0) in an hneh thei a ni.

A tirah Bungkawn

Bungkawn lamin service hmasa in point an hmu hmasa, an in nawr tawn zak zak hnuah RK Lalfakmawii chuan hmun awl hmu fuhin a dah tla keuh - Thenzawl lamin an chhanglet ve nghal zat a ni.

Thenzawl South tan an captain, an Village Council member ni bawk PC Lalrinpuii chuan point an rawn hmu zawn. Kal fal thei an awm lo, point an inhmuh chhawk zak zak; F. Lalparmawii chuan point an rawn vaw chhuak leh zauh ṭhin.

Fakmawii service 'ace' kan hmu a, point thum hmu zawnin 8-4 a hma an hruai laiin an khingpui lamin time out an la. Thenzawl tan Mary Lalbiakmawii rawn che fuhin point a hlawh chhuak a, an dinhmun chawi kang deuh mah se Bungkawn bawk an sang leh tho.

Bungkawn player ṭha F-i leh Chinglunkimi ten hun pawimawh laiah point hlawh chhuak zauh zauhin, heng bakah hian Thenzawl lam tihsual an chhiar zel a, harsatna lian tham tawk loin set khatna chu an la.

Set hnihna chu

Thenzawl South tan Mary Lalbiakmawii chuan a bul ṭan nana a service chu an chhawr ṭangkai thei a, F-i kutthlak na tak chu Lalchhandimi'n a tirah lo dansak thei mah se, a thawh hnihna chu an dang zo ta chuang lo, F-i hian a lai awlah dah leh zeuhin 2-1 in an kang leh phawt.

Fakmawii service a out bakah R. Malsawmtluangi point kan hmu zui a, hma an in hruai chhawk zak zak; 5-5 a nih hnuah Bungkawn lamin point thum hmu zawnin an dinhmun an siamṭha, an khingpui lamin time out an ko zui ve bawk.

Bungkawn tan Elizabeth Laldinthari'n vawi ruk a service dik zawnin an team chu dinhmun ṭha takah a dinpui a, Kimtei a hmuhnawm chhunzawm bawk. Bungkawn kaltluang laiah Sawmtei'n point han hmu ve zauh mah se an tho thei lo.

Service nei ṭha Bungkawn lam an kal fal zel, an fal zual lai phei chuan an inkarah point kua lai a awm chang pawh a awm. F-i leh a ṭhian ten Thenzawl invenna lai vaw hawng zelin set hnihna pawh harsa lo takin an la chhunzawm.

Bungkawn an chungnung

Set hmasa pahnih an lak hnuah Bungkawnin inrintawkna an ngah zual - Kimtei service hmanga point an hmuh hnuah a 'ace' zui leh bawk; point hnih hmu hmasa lehin an chefuh hmasa, Thenzawl lamin point hnih hmang bawkin an changlet.

Thenzawl lamin 7-5 in hma an hruai ve zauh a, mahse an hma an hruai rei lo. Point an inhmuh chhawk zak zak hnuah Bungkawn kal fal lehin 14-9 in hma an hruai a, inkhel boruak tih danglam beiseiin Thenzawl lamin time out an ko chhunzawm.

Point nga laia Bungkawn an kal fal leh hnuah an haiw kir tawh lo. F-i'n Rinpuii block karah a dah thla zauh a; Kimtei, Fakmawii leh Remremi ten point nei zui zel. Championship point hmasa chhawr lo mah se, a vawi hnihnaah an chak tlang.

A tir aṭanga a tawp thlengin Bungkawn lamin inkhel an thunun a, hniam zawk nih lai an nei meuh lo. Tournament khelh nan hun a tlem a, a ni zawn an khelh avangin player an chau, a bik takin Thenzawl lam an tha a tho lo, ni danga an inkhel boruak an phak lo a ni.