England chak mah se Tuchel a lawm lo

England chuan Ningani zan khan friendly match-ah Wales 3-0 in an hneh a, Wembley Stadium-a inkhelah hian Morgan Rogers, Ollie Watkins leh Bukayo Saka ten goal an khung. Three Lions manager Thomas Tuchel chu inkhel entute an ngawih ṭhuap avangin a lawm lo.

Mualneitu hian minute 20 chhungin goal thum hi an khung hman a, ṭan chiah aṭangin an goal bawh a na nghal hle. Minute thumna lekah Marc Guehi siamsak chu Morgan Rogers-a'n cool takin a khung.

Minute 11-naah Guehi cross bawk chu Watkins-a'n a khung a, goal hmasa pahnih khungtute hi Aston Villa player ve ve niin, Crystal Palace captain siamsak ve ve a ni. Premier League big six player-te an lang lo.

Minute 20-naah erawh Arsenal thiampuipa Saka a rawn lang a, box chhung aṭangin goal kilah mawi zetin a hlai lut a, goal class tak a ni. Three Lions hian goal chance dang insiam mah se goal an khung tawh lo.

Inkhelh banah Tuchel chuan, "Stadium a reh a, mipui aṭanga player-te tiphurtu tur thawm a awm lo. Mipui hian nasa takin player-te hi an tiphur thei a, khatiang angah kha chuan second half khelh a harsa tawh a ni," tiin mipui chungah a lawm lo a, a player-te erawh an khelh ṭhat thu a sawi thung.

England hian October 14, Thawhlehni zan dar 12:15 hian World Cup khel tur zawnnaah Latvia an hmachawn ang. Group K-ah Three Lions hian match ngaah point 15 an hmu a, goal 13 khung tawhin goal an la chhuah lo a, October thla chhung ngeiin World Cup khel turin an tlin theih dan a awm.