A dik famkim hi beisei suh u - Taylor

Premier League referee Anthony Taylor chuan inkhel entute chu official aṭanga a dik famkim beisei lo turin a hrilh a, inkhel entuten referee an auh el nasat avangin a chhungten a hmuna inkhel an ngai tawh loh thu a sawi bawk.

English referee Taylor hi Europa League 2023 final-a Roma leh Sevilla inkhelh ṭum khan refere a ni a, team vanduai zawk Jose Mourinho leh a hote referee thutluknaah an lungawi lo hle. Roma fan hoin airport-a a chhungte nena an kal lai thlengin an tibuai a, hemi hnu hian a chhungten inkhel an en ngai ta lo.

Taylor hian kum 15 dawn Premier League-ah referee hna a chelh tawh a, hei bakah hian Qatar World Cup 2022, Euro C'ship vawi hnih bakah European Super Cup leh Nations League final te a kaihruai tawh bawk.

Kum 46 mi Taylor chuan, "Hetiang taka tawrh hi a phu reng em? tih hi ka inzawt fo ṭhin reng a ni. VAR awm hnuah dik famkim turin an beisei a, mahse a nihna takah chuan dik famkim hi a awm thei lo. Tunkarah VAR an duh lo ang a, a karleh lawkah VAR an fak leh ang. Mipui hian an duh an tiihchian a ngai," tiin duhthusam a awm theih loh thu a sawi.