Netherlands tan World Cup a hnai zel

Ningani zan World Cup qualifier inkhelah Netherlands chuan 4-0 ngawtin Malta an sawp a, Ronald Koeman-a enkawl team hian World Cup an hnaih zel.

Netherlands tan Cody Gakpo chuan penalty aṭangin goal hnih a khung a, Tijjani Reijnders leh Memphis Depay ten goal khat ve ve an khung bawk - Malta lamin a chhanletna tur an nei lo.

Dutch team hian qualifier match nga an khelh tawhah tlawm an la nei lo - match li an chakna chiah niin, vawi khat an khingpui an inhnehtawkpui a, World Cup an hnaih ta hle.

A awlsam

Netherlands leh Malta player enin an inthlau tih a chiang a, team pahnih inhmachhawn hma hauhin chak tur a chiang sa, tiin a sawi theih. Mahse, Netherlands hian first half chhungin goal khat chiah an khung.

Minute 12-na lekah Cody Gakpo-a'n penalty aṭangin goal hmahruai a khung a, an goal hnihna pawh penalty aṭang thoa chhuih luh a ni - a pettu pawh Gakpo tho a ni.

Netherlands hian penalty hmang chauha chak erawh an duh lo. Minute 57-naah Manchester City midfielder Tijjani Reijnders chuan khung belhin, a passport an ruksak avanga Dutch team squad zawm lawk thei lo Depay chuan ram tana a goal 53-na hmangin a khar.

Hmabak chu

Netherlands hian October 12, Pathianni zan dar 9:30-ah match an nei lehnghal dawn a, Finland an mikhual ang - Finland hian Netherlands aia match khata khel tamin, point 10 an nei tawh a, World Cup khelh beiseina an la neih avangin Netherlands tan a awlsam dawn lo.

Dutch team awmna group-ah hian Poland an la awm ve bawk a, Robert Lewandowski-a te ram hian point 10 tho an nei ve mek a, direct-a World Cup khelh la beisei ve tho an ni.

Poland hi Pathianni zan dar 12:15-ah an inlan ve leh dawn a, beisei tur nei tawh lo Lithuania an lenchilh dawn - group G hi Europe World Cup qualifier-a group ngaihnawm ber pawl a ni mek zel.

A kalphung

World Cup-a ram thawh hnem thei ber khawmualpui chu Europe an ni a, ram 16 an thawh thei. UEFA hnuaia ram 54-te chu group 12-ah ṭhen hran an ni a, group tina a sang berte ṭheuh chu World Cup khel tura tling nghalin, pahnihna 12-te chuan playoff kaltlangin chance an nei leh ang.

Playoff-ah hian qualifier aṭanga tling si lo, Nations League group winner zinga ranking sang palite chu an inlan ve leh dawn bawk a, hmun ruak pali la awm chu anni ho hian an inchuh leh ang.

November-ah group inelna hi an zo ang a, March 2026-ah playoff khelh a ni ang. UEFA hian World Cup-ah direct-in ram 16 thawh thei mah se,

intercontinental playoff-ah hmun an nei ve miah lo thung a, khawmualpui zinga intercontinental playoff khel lo tur awmchhun an ni.