Boruak lum tak hnuaiah Djokovic a chak

Novak Djokovic chuan China ram boruak lum tak hnuaiah inkhelh harsa a ti hle, a taksa lamah harsatna tawk deuh mah se Zizou Bergs hnehin Sanghai Masters khelh laiah semifinal a in vaw kai.

Ningani zan quarterfinal inkhelah, seeded palina Djokovic hian Zizou Bergs hi 6-3, 6-4 in a hneh. Serbian star hi kum 38 mi a ni tawh a, Grand Slam dawta inelna ngaihhlut Masters 1000 huangah semifinal lut thei upa ber a ni nghal bawk.

Masters 1000 semifinal vawi 80 a lut tling ta a, nomawi chawi turin vawi hnih chak a la hmabak. Djokovic te inkhelh lai hian khaw lum lam chu 35C a tlin bakah, boruak hnawn lam chu 80% a tling phak hial - Europe ram vawta khawsa ṭhin tan chuan a awlsam lo.

Grand Slam vawi 24 champion tawh Djokovic chuan, "Keimah chauh ka ni lo a, player dang tan pawh a awlsam lo vek. Theih ni se la chuan a rei lo thei ang bera hnehna chan kha ka chak ṭhin, mahse duh ang vekin thil a thleng thei bik si lo a ni," a ti.

Serbian star Djokovic hian tun hmain Shanghai Masters title hi vawi li a lo la tawh a, a vawi nga nan champion leh a tum mek, a match lehpekah chuan Valentin Vacherot a hmachhawn leh ang.

Inkhel dangah Valentin Vacherot hian seeded 10-na Holger Rune chu 2-6, 7-6 (7-4), 6-4 in a hneh a, a dai ngai loh ram a dai chhunzawm zel, tournament a khelh ṭhat avang hian ranking chhuak tharah chuan a vawi khat nan world number 100 huangah a lut ve dawn a ni.