Swiatek leh Sabalenka an chak

Hmeichhe tennis inelna Wuhan Open lamah player ṭha pahnih Iga Swiatek leh Aryna Sabalenka te an chak zel a, quarterfinal leh semifinal an in hlangkai - final hma erawh chuan an inhmachhawn thei lo thung.

Swiatek hian player ṭha Belinda Bencic chu 7-6 (7-2), 6-4 a hnehin quarterfinal a lut a, Grand Slam vawi ruk champion tawh hian a match lehpekah chuan Jasmine Paolini a hmachhawn ang, ani hian Clara Tauson a paltlung thung; Tauson hi hliam vangin a inkhel tluan thei lo.

Polish nula Swiatek chuan, "Inrintawkna nen nuamti taka inkhelh hi chu a lungawi thlak ṭhin, tun ṭumah pawh khan duhthusam vek chu ni lo mah se lawmna tur lam kha a tam zawk a ni," tiin a sawi.

Inkhel dangah Aryna Sabalenka chuan seeded 16-na Liudmila Samsonova chu 6-3, 6-2 in a hneh a, nimin tlai khan Rybakina chu 6-3, 6-3 in a hneh zui leh bawk a, semifinal a lut. Wuhan Open bikah match 20 a chak tling ta chiah a, sulhnu a nei ṭha hle.

Belarusian player Sabalenka hian tun hmain Wuhan Open nomawi hi vawi tum a lo la tawh, kum 2018, 2019 leh 2024 te khan a hlawhtling a, kuminah pawh champion tura rinkai ber anga chhal thei a ni.