Season bul ṭan lo tur LeBron James

LeBron James chuan NBA season tharah a tir aṭangin match a khel ve thei dawn lo - American star hi 'sciatica' vanga enkawl a ni a, bul a ṭan theih loh tur thu hi a club Los Angeles Lakers chuan an ti chiang tawh a ni.

Kum 40 mi James hian kumin June khan Lakers tan contract a ziak thar a, basketball inelna ngaihhlut berah hian season 23 chhung chawl loa inlan thei hmasa ber a ni a, a bul a ṭan thei lo a nih pawhin a rei deuh hnuah inlan ngei tura ngaih a ni.

Sciatica vang hian a hnungzâng leh a ke a na a, a nerve a khawih avangin a inkhel thei lo; season thar inbuatsaih nana Golden State Warriors leh Phoenix Suns an hmachhawn ṭum pawhin a inlan thei lo.

NBA champion vawi li ni tawh James hian season hmasa khan Lakers match 80 zinga 70 lai chu a la khel thei a, match khatah chawhrualin point 24.4, assist 8.2 leh rebound 7.8 la nei thei a, a dam ṭha a nih phawt chuan a la ṭha hle.

Lakers hian season hmasa khan playoff an khel phak a, mahse Minnesota Timberwolves an hneh lo; kuminah beiseina thar nena season bul ṭan turin an inbuatsaih chho leh mek a ni.