MPL12: Ni kaw chhungin round thum

GIG Motors Mizoram Premier League Season 12-ah round thum chauh khelh tur a awm tawh a, ni kaw chhungin khelh zawh vek a ni dawn. Vawiin hian round 12 khelh ṭan a ni dawn a, round tawp ber hi October 21, Thawhlehniah khelh zawh a ni ang. Mizoram chhunga football inelna sang ber hi Zonet Rinhnim, Empai leh YouTube (member only) ah te a en theih a ni.

MPL12-ah hian Aizawl FC-in semifinal lut chiang tawh mah se team an intluk tawk hlawm a, champion tur hriatthiam har ber ṭum season a ni hial ang. Chanmari FC, Dinthar FC leh Saikhamakawn FC te semifinal lut turin an dinhmun a ṭha tawh a, chutihrualin fixtures thlirin MLS FC pawhin knockout stage luh beiseina sang tak an nei ang.

Chhiarkawp dan chuan Mizoram Police leh Kanan FC tan pawh semifinal luh theihna kawng a inhawng a, mahse a tak ramah chuan beisei ngam chi a ni tawh lo. Chutihrualin Police leh Kanan te hian relegate lo turin theihtawp an chhuah thung dawn a ni.