Mizo tleirawlte an champion

All India Inter SAI (Men & Women) Under 16 huangah, Mizo tleirawl hockey khel thiamte an chungnung ber. Thenzawl (SAI) te hian final-ah Sundargarh SAI chu 3-1 a hnehin an champion a ni.

Sundargarh SAI lakah hian Mizoram tan Malsawmzeli chuan goal hnih a khung bakah, Vanlalpeki chuan goal khat dang a khung ve bawk.

Inelna hi SAI NSSC Bengaluru-ah October 6-11, 2025 chhung khan neih niin, Mizoram team tan forward K. Vanlalpeki chu final-ah player of the match ni khawpin a khel ṭha a, defender Laldinpuii chuan player of the tournament lawmman a dawng bawk.

Team 11 inelnaah Mizoram hian final hma hian Hyderabad, Badal, Ranchi leh Hissar te an hneh vek bawk. SAI Thenzawl Center-ah hian Mizoram hmun hrang hrang aṭanga hockey khel thiam thlan khawmte an awm a, anni hian Mizoram ai an awh a ni.

Sports Minister Lalnghinglova Hmar chuan Mizoram team lawmpuina thu sawiin, "All India Inter-SAI U-16 Women Hockey Championship-ah Thenzawl SAI Women Hockey Academy (STC Thenzawl) an champion hi thinlung takin ka lawmpui a, ka chhuang takzet a ni.

"Mizote’n Hockey-ah theihna sang tak kan nei a, a bikin hmeichhe hockey-ah result leh player chhuanawm tak tak kan nei. Mizoram sorkarin Vision 2036 Olympics leh ‘Empowering Mizoram Sports’ a kalpui turah pawh Hockey hi discipline ngaih pawimawh zingah a tel a ni," a ti.

Thenzawl aṭang hian player ṭha tam tak an chher chhuak tawh a, India tana inlan phak pawh an awm nual - Lalremsiami Hmar pawh Thenzawl aṭanga inzir chhuak a ni a, tun dinhmunah India senior team player pawimawh a ni mek.