Zanin dar 7:00-ah Dinthar FC Vs Aizawl FC

13th October, 2025

GIG Motors MPL12-ah zanin dar 7:00 hian Dinthar FC leh Aizawl FC te an inkhel dawn a, Maimawms hian semifinal ticket a la neih loh avangin I League club lakah point hmuh ngei an tum dawn. Chutihrualin Aizawl FC hi an chak a nih chuan match hnih khelh hmabak nei chungin league winner an ni ang.

RG Stadium-a inkhel en man hi Rs 50 chauh a ni a; Zonet Rihnim, Empai leh YouTube (member only) aṭangin a en theih bawk. Aizawl FC-in tun season-ah record pathum an la beisei thei ang. Inelna hnuhnung pathumah goal an chhuah tawh lo a nih chuan goal ruk chauh chhuahin, season khata goal chhuah tlem ber record an siam dawn.

R. Lalruatfela hote hian match thum khelh hmabak aṭanga point sarih an hmuh theih chuan season khata point hmu tam ber record an siam dawn a, MPL-ah league round-ah point 36 hmu an la awm ngai lo. Match hnuhnung pathumah an tlawm loh chuan season liam ta ang thoin tlawm nei loin league round an khar thei bawk ang.

Mahse, Aizawl FC tan record nge pawimawh champion tih hi zawhna awm thei chu a ni. I League club hi an squad a chhah lo a, striker C. Lalhriatpuia leh defender T. Lalmuanawma te chu hliam vangin an chhawr thei tawh dawn lo. Match hnuhnung berah goalkeeper Vanlalhriatpuia chu khup hliam vangin inkhelh laiin inenkawl a ngai a, defender rinrawl Rohmingthanga lakchhuah a ngai bawk. Match thum khelh hmabak hi ni kaw chhunga khelh zawh a ni dawn a, coach R-a pawhin semifinal-a dah dik turin league round khelh hmabakah player a siksawi hret a ṭul ang.

Chutihrualin Aizawl FC tana chanchin lawmawm chu Zomuansanga'n mamawh hunah goal a khung zel a, Khawbel goal machine hian MLS lakah hattrick siamin season khata goal khung tam ber record nih rualin goal 13 a khung tawh. Zomuana hian Dinthar laka goal a khung thei a nih chuan record thar a siam dawn.

I League club hmaah record thar a inchhawp a, a nawr buak sak theitu chu Dinthar hi an ni. Maimawms hian goal 26 khung tawhin Aizawl FC dawta goal khung tam ber an ni a, hei hian tlarhma an nei ṭha tih a pholang. Mahse, an intawn hmasak ṭumin Aizawl FC hian Dinthar hi 5-1 in an sawp a, goal khung thei bik striker Zomuana a khel lo zawk. Khawbel tlangval hian Dinthar lakah a khung thei a nih chuan MPL club pasarih lakah goal a khung vek dawn tihna a ni ang.

Coach Laldampuia hote tana chanchin lawmawm erawh Dintharin hma an sawn a, hliam vangin Jerry Lalchhanchhuaha chhawr thei tawh loh mah se C. Ramnunpuia (Tea Chinzah) rawn khel ṭhain Jerry hmun ruak pawh a zim ta hle. Dampuia'n an ṭhat dan ber a hre ṭan a; tawnhriat nei ṭha MS Dawngliana leh R. Laldanmawia te a hmang thiam a, Aizawl FC an barakhaih thei ang.

Hei bakah hian an elpui MLS FC leh an hmelma Chanmari FC te an hmachhawn dawn a, Aizawl FC laka point an hmu lo a nih chuan hmabak a la harsa thei. Nuam sa taka semifinal lut turin Dampuia hote tan Aizawl FC laka point hmuh hi a pawimawh takzet a ni.