MLS thawhchhuah hun?

GIG Motors MPL12-ah kai thar MLS FC-in semifinal khelh tumin inelna an hmachhawn a, round 12-ah pawh an thil tum tihlawhtling turin beiseina an la nei sang hle. Lawngtlai club hian vawiin tlai dar 3:00 hian table mawngphaha awm SYS FC an hmachhawn anga, an chak a nih chuan a sang pali zingah an tel ang.

Mahse, MLS hian match nga chhung chak loh an nei loh hnuah match hnuhnung berah Aizawl FC lakah 4-1 in an tlawm. Lawngtlai hian coach thar Lalruatliana Sailo (Tawia) hnuaia an match hmasa berah chak lo chiang mah se I League club tan hun harsa siam hun lai an nei tho. Second half-ah ṭantirhah MLS hi goal hmaah vannei se, Aizawl FC lakah point an hmu thei hial ang.

MLS hian vawiina an hmachhawn tur SYS hi 1-0 in an hneh tawh a, Falton N. Beirachakhei-a'n goal awmchhun a khung. Hei bakah hian Lawngtlai club-in point 14 an hmuh tawh laiin SYS-in point khat chauh an hmu a, an point hmuh aṭanga team pahnih an inthlau hle.

Tawia hote hian hliam vangin midfielder pawimawh Lalremmuana bakah goal ruk khung tawhtu M Lalpektluanga an chhawr theih a rinawm lo a, tlarhma lamah a bil phah deuh ang. Chutihrualin Freddy Lalrinkima, Ricky H. Vanlalhriatsanga leh Ngurthanmawia te an dam ṭha a, SYS laka chak turin an ṭha tawk.

SYS hian MLS laka an chak lo a nih chuan chhiarkawp dan thlapin an relegate dawn a, hei bakah hian Lunglei club tan ṭan chhan tur a la awm. Coach Lalmuankima hote hian MPL12-ah point khat chauh an la hmu a, season khata point hmu tlem ber record pumpelh turin match thum aṭangin point li hmuh a ngai.

Lunglei club hian MLS bakah Chanmari leh Kanan FC te an la hmachhawn dawn a, Lawngtlai club hi point thum hmuh an beisei theihna a ni thei ang. SYS hi hnufual deuhin lang mah se an naupang rual a, an tlan thei a, eng team tan pawh khelh a harsa vek. Coach MK-a hoten September 5, Zirtawpnia Mizoram Police nen an inhnehtawk hnuah point an la hmu leh lo a, thla khat chuang hnuah point hmuh an tum ang.