Chanmariin Services duo la lut

Chanmari FC-in GIG Motors MPL12 champion ngei an tum a, Santosh Trophy leh National Games-a Services champion puitu captain Christopher Kamei leh defender ṭha mi Zothanpuia (Thangpuia) te an la lut. Falkland tlangval Thangpuia hi MPL hmasa pahnihah best defender a ni a, Chanmari FC champion hmasak ber ṭuma captain a ni.

I League club Chanmarians-in Christo leh Thangpuia te an lakluh avangin MPL12 khelh mekah pahnihnaah awm mek mah se nomawi chawi tura champion rin kai ber an ni ang. Rochhingpuia enkawl Chanmari hi MPL12-ah squad chhah ṭha ber an ni sa hrim hrim.

Thangpuia hi Mizoramin Santosh Trophy an champion pawh khan defender rinrawl a ni a, Aizawla qualifier khelh zawh hian Lammualah Dr TAo Football neih chhunzawm niin Mizoram champion puiin best player-a thlan a ni bawk. Santosh Trophy zawhah Thangpuia hi inkhel turin sipaiah a lut a, season liam ta khan Aizawl FC tan I League a rawn khel bawk a ni.

Christo hi midfielder ball thiam bik a ni a, team ṭha Services-a captain hna chelh thei niin MPL tihmuhnawm theitu tur a ni. Services-in kum 2024-a Santosh Trophy an champion khan Christo hian hmun pawimawh a chang a, qualifier leh semifinal-ah Lalsangzuala Hmar enkawl Mizoram team an hneh ve ve. Tun ṭumah pawh Sanga enkawl Saikhamakawn champion-na kawng dal theitu an ni dawn.

Kum 2023-ah khan Goa-ah National Games khelh a ni a, Services hi Christo hoin an champion. Manipur midfielder hi a game a nghet ṭha a, a ball sem a ṭha a, freekick a pet thiam a, tihsual saltiah a nei ngai lo. Kumin Durand Cup-ah pawh khan Services tan khelin, Christo hian match thumah goal leh assist vawi hnih ve ve a nei a ni.