Gerrard-a'n Rangers a hnar

Liverpool legend Steven Gerarrd chuan a club hlui Rangers enkawlna remchang nei mah se, a chance neih hi a hnar a, English coach hi technical area-ah beisei angin kan hmu leh rih lawk dawn lo.

Gerrard hian Rangers hi 2018-2021 inkar kha lo enkawl tawhin, 2020-21 season-ah khan league nomawi a chawipui a, kum 10 hnua Rangers-in Scottish Premiership nomawi an chawi leh hmasak ber a ni.

Kum 45 mi Gerrard hian November 2021 khan Rangers hi chhuahsanin, Premier League club Aston Villa a enkawl a, a season hmasa berah 14-na nihpui mah se, a season hnihnaah match 12 chiah a kaihruai hman tihin ban a ni.

Villa Park a chhuahsan hnuah Saudi Pro League club Al-Ettifaq a zawm a, mahse, January 2025 khan inhriatthiam tawnnain an inṭhen ve leh bawk.

Club enkawl nei loin Gerrard a awm reng a, sawmtu a neih thu sawi mah se, "Chak tuma inel ṭhin team ngei enkawl ka inhmeh a ni," tiin a club duhthusam a la hmu lo.

Rangers pawhin an coach Russell Martin an ban hnuah Gerrard hi an dawr a, ni hnih zet indawrna an neih hnuah an inrem thei lo. Liverpool midfielder hluiin Rangers a hnar chhan hi chiang taka tarlan awm lo mah se, a 'timing' chu fuh rih loah a ngai niin an sawi.