Enzo Fernandez a inhnukdawk

Argentina midfielder Enzo Fernandez chu a khup dinglam hliam vangin an ram team aṭangin a inhnukdawk - October 15, Nilaini zinga Puerto Rico nen friendly match an khelh hunah a inlan ve thei lo ang.

World champion Argentina hi World Cup 2026 khel turin an tling leh tawh a, inelna lian inbuatsaih nan hian freindly match an khel chho mek - Inrinni zing pawh khan Venezuela chu 1-0 in an hneh, goal awmchhun hi Giovani Lo Celso khung a ni.

Kum 24 mi Fernandez hi Venezuela lakah a inlan a, an match dawt lehah pawh hian inlan tura ngaih ni mah se a hliam ta a ni. A khelhna Chelsea tan chuan chanchin hriat nuam tak a ni lo mai thei a, a chawlh chen tur erawh hriat a la ni lo thung.

Argentina tan hian captain Lionel Messi pawh a inlan rih lo, coach Lionel Scaloni chuan player naupang leh inkhel khat deuhte tan hmun a siamsak. Messi hian nimin zing khan Inter Miami tan match a khel a, goal hnih a khung bakah assist vawi khat neiin Atlanta United lakah a team hi 4-0 in a chakpui a ni.