Hriat hlawh lo lakah Djokovic a tlawm

Novak Djokovic chuan a tum ram a thleng thei rih lo - Serbian star hi Shanghai Masters 2025 champion tura rinkai ni mah se player langsar lo Valentin Vacherot hneh loin semifinal-ah a zinkawng a tawp.

Inrinnia inkhelah, seeded palina Djokovic hi chungnung zawk tura rinkai a ni, mahse world number 204 Valentin Vacherot lakah hian 6-3, 6-4 in a chak lo. Masters 1000 huangah Vacherot-a hi final lut thei ranking hniam ber a ni ta hial.

Djokovic hian hliam leh harsatna neuh neuh a nei chho ta fo a, kum 38 mi a nih tawh bawk avangin a tan thil a awlsam ta bik lo, tun ṭumah pawh hian player langsar dang an chetsual hnuah la dam mah se a tawp a thleng zo ta bik lo a ni.

Grand Slam vawi 24 champion tawh Djokovic chuan, "Valentin-a ka lawmpui takzet, qualifying khel chunga final thlen theih chu a ropui, hetiang zinkawng ngaihnawm hriat tur awm ṭhin hian tennis a tihlu zual em em ṭhin.

"Khaw lum leh boruak hnawng hnuaiah kan inkhel a, a awlsam lo hle. Chutihrualin, hetiang boruak hi chu player dang pawhin an tawn vek a nih avangin chhuanlam atana hman a remchang lo ang," tiin a sawi.

A vanglai a liam ve tawh avangin Djokovic tan Grand Slam champion nih belh a harsa tawh a, major tournament dawta inelna ngaihhlut Masters 1000 title lak belh pawh thil awlsam a ni ta lo, a tennis zinkawng chu a liam ve mek a ni.

Djokovic hnehtu Vacherot leh Arthur Rinderknech ten nizan khan final an khe zui a, chanchinbu buatsaih lai hian result kan hre hman lo.