Zanin dar 7-ah Relegation Battle: Mizoram Police FC Vs Kanan FC

GIG Motors MPL12-ah zanin dar 7:00 hian paruknaa awm Mizoram Police leh pasarihnaa awm Kanan FC an inhmachhawn dawn a, RG Stadium-ah relegation battle hmuhnawm thlir tur a awm ang. MPL-ah hian table mawngphaha awm an relegate a, pasarihnaa awm hian MPL qualifier-a pahnihna nen relegation battle an khel ṭhin.

Kanan FC-in champion tumin season bul an ṭan a, MPL harsatzia a takin an hmu. Champion tum team khan him hram dan an zawng a, coach thar Samson Ramengmawia an la lut. Samson-a hnuaiah Kanan hian chak hmel an a la hmu lo a; Dinthar FC leh MLS FC nen an inhnehtawk hnuin match hnuhnung berah Chanmari FC lakah 5-1 in an mualpho.

Samson-a hote hian point kua an hmu mek a, point 10 hmu tawh Police hi an hneh lo a nih chuan an inkarah point li a awm dawn a, relegation playoff khel turah an ngaih theih deuh thaw ang. Kanan hian Saikhamakawn leh SYS FC an la hmachhawn dawn a, Police-in Aizawl FC leh MLS FC an hmachhawn thung ang.

MPL-ah hian goal difference aiin head to head an en hmasa tih hriat a ṭha bawk. An intawn hmasak ṭumah 3-3 in an inhnehtawk a, tun ṭuma chak hi head to head-ah an ṭha zawk dawn. Hei vang hian vawiin inkhela chak hi a pawimawh lehzual.

Kanan erawhin an intawn hmasak ṭuma hun ṭha an bawhpelh kha an ui lehzual ang. Police lakah Kanan hian first half-ah 3-1 in hma an hruai a, chance ṭhahnem tak an hlah bawk. Mahse, second half-ah inkhel kalhmang a inthlak a, Police-in point an hlawh chhuak ta zawk.

Hemi hnu hian Kanan hi a hniam zawngin an kal a, Mizoram Police erawh coach Lalbiaksanga Coney a rawn kir tawh bawk avangin hma an sawn hret. MPL10 champion hian relegate an tum lo a, MPL qualifier-ah First Division champion Ramthar emaw league winner Ramhlun North emaw te tum theih a nih vangin relegation playoff pumpelh hi a him ber.

Police hian khelh dan nghet an nei chho leh tawh a, match hnuhnung berah SYS FC hnehin Kanan FC lakah chak ngei an tum bawk ang. Tawnhriat nei ṭha kianga tal turin Police hian 1st Bn MAP Academy aṭangin Keiṭum tlangval Lalbiaktluanga leh Tuidam tlangval R. Zothantluanga te an la chho a, an ṭangkaipui hle.