Ngura'n MLS beiseina a siam

GIG Motors MPL12-ah MLS FC-in nimin khan Ngurthanmawia goal hnih hmangin table mawngphaha awm SYS FC 4-0 in an sawp a, a sang paliah invawrh chhoin semifinal beiseina an nei sang hle. RG Stadium-a inkhelah hian Ngura bakah Freddy Lalrinkima leh Falton N. Beirachakhei ten goal khat ve ve an khung bawk.

MLS hian inkhelh ṭantirh ṭangin inkhel an thunun nghal a, SYS FC chhuak Ngura'n minute 15 lekah kawh zetin a pet lut a, a club hlui a hmachhawn vangin a goal khung a lawm duh lo. First half injury time-ah Tanhril tlangval Freddy-a'n penalty aṭangin a khung belh a, MLS penalty specialist M. Lalpektluanga hliam vanga a inlan theih loh avangin Freddy hian mawhphurhna a la.

Second half-ah Ngura'n minute 62-naah MLS goal thumna a khung a, a pet kawh ṭha hle. Minute nga hnuah bench aṭanga lut Falton-a'n Republic Vengthlang B. Lalrosanga siam chu a khung leh bawk. MLS chungnung chhunzawm mah se goal a luh belh lo.

Dinthar FC, MLS leh Saikhamakawn ten semifinal hmun ruak pahnih an la inchuh chhunzawm dawn a, nizan lama Maimawms-in Aizawl FC an hneh a nih chuan anni hi chu an himah a ngaih theih ang. Lawngtlai club hian Dinthar leh Mizoram Police an hmachhawn dawn a, Saikhamakawn hian Kanan FC leh Aizawl FC an hmachhawn thung ang.