France enkawl châk Zidane

Zinedine Zidane chuan engtik niah emaw chuan France football team a la enkawl ngei a rin thu a sawi a, tuna an coach Didier Deschamps a chawlh hnuah a hna a thawh chhunzawm sak ngei a inring.

Player a nih laiin Zidane hian an ram team hi hlawhtlinna a lo chanpui tawh. World Cup 1998 an champion dawn ṭum khan Brazil lakah goal hnih a khung, team enkawl lamah pawh a mikhual lo - Real Madrid chu a zawnin season thum chhung Champions League nomawi a chawipui tawh bawk.

Zidane chuan, "Team enkawl hna hi chu ka la thawk ve leh ngei ang. Engtik hunah nge a lo thlen dawn ka sawi thei lo, mahse kan ram team enkawltu nih hi ka duhthusam a ni a, engtik niah emaw chuan a la thlen dik pawh ka ring.

"Football hi ka hmangaih a, keimaha tawnhriat awm tam tak hi midang hnena hlan chhawn zel ka duh. Coach nih chuan team hlawhtlinpui kha a pawimawh ber bawk," tiin a sawi a, an ram team hlawhtlinpui a châk hle.

Kum 53 mi Zidane hian an ram team enkawl a châk thu a sawi ri fo a, mahse tuna an coach ṭang lai Deschamps a chhuah hma chuan hun remchang a awm thei rih bik lo a ni.