Thil mak thlen tirtu Vacherot

Valentin Vacherot chu mumang ramah a cheng a, a duhthusam chu a takin a thleng dik ta. Mipa tennis world number 204 Vacherot hian Arthur Rinderknech hnehin Shanghai Masters nomawi a chawi.

Qualifying paltlanga inlan ve hram a ni a, a tan chuan final kha beisei ngam chi a ni lo. Mahse, Pathianni zan tir lama tournament an khelh zawh meuh chuan a chungnung ber, nomawi la tur hian a cousin Arthur Rinderknech hi 4-6, 6-3, 6-3 in a hneh.

Vacherot chauh a ni lo, a khingpui Rinderknech pawh hi world number 54-na daih a ni a, ATP Masters 1000 tournament bikah chuan seeded chang phak lo pahnihin final an khelh dun ṭum thumna chauh a ni hial.

Kum 26 mi Vacherot chuan, "Thil thleng thei a ni tih ka hria a, mahse a taka a thlen erawh chu ka ring ngam bik chiah lo. Mumang rama ka lo man tawh ang kha ka tawng a, ka lawmna hi thuin a sawi fiah zo lo ang.

"Chawlhkar hnih chhunga tennis ka khelh dan kha chu a mak zawk, hetiang taka ṭha leh tluang hian tun hmain ka la khel ngai lo," a ti. Stadium Court khat tlata mipui pungkhawm hmaa inkhelh chu ropui a tih thu a sawi bawk.

A tir lamah - Laslo Djere, Alexander Bublik, Tomas Machac leh Tallon Griekspoor te a hneh a, khami chauh pawh kha sulhnu ṭha niin Monaco tana inlan player zingah Masters 1000 quarterfinal lut thei hmasa ber a ni.

Quarterfinal hi a tawpna a la ni mai lo, player ṭha Holger Rune a hneh pawh khan titi a titam tawh a, chumi hnuah Grand Slam vawi 24 champion Novak Djokovic a hneh - Serbian star hi Shanghai Masters vawi li champion tawh a nih bawk avangin a hneh thei hi a mak zual.

A mumang aṭanga harh chhuak zui loin a tawp a thleng a, tunah chuan khawvelin a hming a hre ta a ni. Kum 1990 hnu lamah Grand Slam dawta inelna ngaihhlut ATP Masters 1000 huanga champion thei ranking hniam ber a ni ta a ni.