Goal rang ber khungtu Sawmsanga

GIG Motors MPL12-ah nimin tlai khan Chanmari FC-in table mawngphaha awm SYS FC 4-0 in an sawp a, Serchhip tlangval KC Malsawmsanga'n second 12 lekah goal khungin tun season-a goal khung rang ber a ni.

I League club Chanmariin bul an ṭan ṭha a, PC Rosangzuala aṭanga ball chhuak chu Sawmsanga hian changin, box chhungah la lutin kawh zetin a pet lut. Minute 31-naah C. Lalmuanpuia'n box pawn aṭangin a inzirchhuahna SYS lamah ṭha zetin a volley leh bawk.

Second half-ah Chanmari bawkin bul an ṭan ṭha a, Christopher Kamei leh PC-a te thawhrah sengin minute 53-naah Sawmsanga'n a khung. Minute 54-naah Sawmsanga cross chu keeper-in dang mah se a per chu SYS captain H. Lalhumhima'n (Pepe) an lamah a tauh lut.

SYS lam hian first half lamah chance nei ve bawk mah se second half-ah erawh Chanmari an chungnung a, hun tawp hnaih lamah SYS player zinga tawnhriat nei ṭha Tsa Zadeng hnawhchhuah niin Lunglei club-in goal tam zawk an chhuah belh lo hi an vannei hle. Lunglei club hian point khat chiah an la hmu a, match hnuhnung berah relegation zone-a awm Kanan FC an hmachhawn dawn.

Chanmari FC-in match hnuhnung berah Dinthar FC an hmachhawn dawn a, Zo Clasico hi hi inkhel en châkawm bik a ni dawn. Maimawms hi semifinal khel turin an dinhmun a la chiang lo a, Chanamrians hian kum 10 liam ta (MPL2) anga Dinthar 'bye bye' an duh ang.