Odegaard dinhmun a la chiang lo

Premier League hmahruaitu Arsenal manager Mikel Arteta chuan a captain Martin Odegaard dinhmun a la chian loh thu a sawi a, "Kar engemaw zat chu a la mamawh ang," tiin a sawi.

Norwegian midfielder hi tun thlatira 2-0 a West Ham an hneh ṭum khan hliam vangin lakchhuah a ngai a, a la chawl mek. Arteta chuan, "Engtikah nge a lo kir dawn sawi theih a la ni lo.

"Tun season-ah hliam vangin a talbuai leh ṭhin a, a vanduai khawp mai. Kar engemaw chen a chawl ang a, a lo kir leh ang. A hliam dinhmun hi zirchian zel la ngai a ni a, a awm zel dan tur sawi nan chuan a la hma hret a ni," a ti.

Hliam vanga Odegaard an chân laiin Arsenal midfielder Martin Zubimendi chuan training a zawm lo niin khawthlang media-ten an tarlang a, Arteta chuan thil hlauhawm a nih loh thu a sawi.

Spanish coach chuan, "Kan player-te hi ram hrang hrang aṭanga lo kal an ni a, an game khelh zat leh minute neih zat pawh a inang lo. Zubimendi hian match hnih a khel leh a, hahdamna hun a neih tlem em avangin kan chawlhtir a ni. Engkim a ṭha e," tiin a sawi.

Gunners hian zanin dar 10:00-ah league match khel turin Fulham an mikhual dawn a, champion tum tan vawi khat chetsual pawh a pawi thei.