Bayern tlawh turin Kovac leh Dortmund an inpeih
Bundesliga season kal laiah la tlawm miah lo pahnih an awm - Bayern Munich an la chak kim vek a, vawi ruk an inkhelh tawh chinah Borussia Dortmund an la tlawm lo bawk, anni erawh an khingpuite nen vawi hnih an inhnehtawk tawh thung.
Zanin dar 10:00 hian Allianz Arena-ah Dortmund hi an lenglut dawn, an coach Niko Kovac chuan Bavarians hmachhawn turin an inpeih tih a sawi a, an tan chuan 'Klassiker' chu fiahna lian tak a nih tur thu a sawi bawk.
Dortmund coach Kovac chuan, "Team lian leh ṭha tawk tak kan ni a, khawi khelmualah pawh lenglut ni ila kan inpeih reng tur a ni. Ka naute hian season bul an ṭan fuh avangin inrintawkna pawh an nei sang hle.
"Chutihrualin, Bayern Munich erawh team danglam an ni a, an nomawi chawi tawh zat aṭanga teh hian thil chu chiang takin a lang nghal mai, tunah pawh hian team ṭha tak ni mah ila keini aiin Bayern hi an ṭha zawk.
"An ṭhat zawk avangin kan hlau emaw kan huphurh emaw tihna erawh a ni chuang lo. A ṭha leh lian zawk an chak loh chang a awm fo, player inzata inkhel tur kan nih avangin engmah hi chiangsa a awm thei lo," a ti.
Bayern Munich hian Dortmund lakah sulhnu an nei ṭha zawk, mahse Dortmund hian Bundesliga match bikah German champion an tlawh hnuhnung pahnihah hnehna an chang thei, zaninah pawh inrintawkna sang tak nen an tlawh thei ang.
Vincent Kompany-a'n tlarhma laiah Harry Kane a nei a, England captain hian club leh ram tan goal khung a bansan thei lo. Tottenham Hotspur striker hlui thlawp tur hian Luis Diaz a nei bawk.
Liverpool forward hlui Diaz hi Bayern tan a insiamrem rang hle a, an khelh dan phung a man nghal bakah Kane nen an inkawprem hle, tun ṭumah pawh hian Dortmund tan ven ngun ngai bik tur an ni ang.
Bundesliga hmahruaitu Bayern hi an hmatawng an hriam, league goal 25 an khung tawh - a hnung lam a phui ṭha bawk, goal thum chauh an la chhuah. Kovac-a enkawl Bortmund pawhin goal li chiah an la chhuah, a hnung lam phui hi an innghahna a ni ṭhin.
Croatian coach Kovac chuan, "Mahni inven hmasak a pawimawh, kan inveng thei a nih chuan kawng a awlsam phah ṭhin. Kan inveng ringawt dawn tihna erawh a ni lem lo, chak tur chuan goal khung tuma nawr pawh a ngai," a ti.
Player a nih laiin Kovac hi Bayern Munich tan a lo khel tawh ṭhin a, manager a nih hnuah pawh Bavarians hi a enkawl tawh bawk, a hrechiang dawn hle. Tunah chuan Dortmund enkawltu a ni tawh a, a hmangaih hmasa hneh tumin theihtawp a chhuah ang.
Kompany-a'n a tirah Bayern Munich hi a hlawhtlin pui nghal mai bik lo, a insiamrem hnuah erawh fal taka kal chungin Bundesliga champion an ni thei. Tun season pawh bul an ṭan fuh em avangin an hmaa ding nih chu thil huphurhawm tak a ni.
Bayern tan hian tehna a sang ṭhin thung, league champion nih chauh hi hlawhtlinna famkim a nih ṭhin loh avangin European football an ngaihtuah tel a ngai a, an hma lawka Champions League khelh hmabak an neih hre reng chungin team an inrem a ngai ve
ṭhin bawk.
Zanin atana pawimawh ber erawh chu, an elpui leh anmahni nawr buai phak ber Dortmund hneh hmasak hi a ni a, a tir aṭangin Kompany pawhin a player neih ṭhat ho a luh tir nghal ang, an chak a nih chuan thlamuang takin season an hmang chhunzawm thei dawn a ni.